當陳柏宇、周柏豪同余文樂都封盤成為人夫之後，世界已經末日咗。

係…咁…仲有好多男神選擇，例如，坤哥啦，胡鴻鈞啦，er…

不如都係講番啲開心嘢吖，余文樂明年六月做爸爸喇！恭喜晒恭喜晒！

之前《蘋果》已率先爆料，指當時仲未係余太嘅皮帶大王千金王棠云（Sarah）有喜，仲拍到女方來港，由女性友人陪同下到中環睇醫生。當時余文樂就笑稱係女友陪朋友睇醫生至係。

開心事加人生大事，余文樂都好想同大家分享，只係要等適當時機。自言好喜歡小朋友嘅余文樂，突然在IG貼圖宣佈已婚，今日有周刊更報道指據知Sarah預產期係明年6月。

報道話喺拍拖初期，余文樂已經有結婚嘅打算，佢仲曾經講過，如果佢唔係做呢一行嘅話，可能唔到30歲就已經結婚，因為佢好鍾意小朋友，亦好想有自己嘅家庭，最緊要係搵到一個同佢共同想法嘅另一半，結果終於實現咗呢件事，難怪佢話：「在對的時間，遇到對的人，感謝上天把最好的妳安排在最好的時候出現。」

另一方面，今日台灣《蘋果日報》報道話，王棠云嘅前度，即係籃球明星男友毛加恩，俾人影到同女友拍拖。對於前度王棠云結婚一事，毛加恩話：「祝福她，能找到好的對象，也替她爸媽開心。」