【新增影片】
大台新劇「再創世紀」，主題及故事圍繞在金融海嘯後近10年香港金融經濟發展。大台劇集唔單只節目創新，連劇中股票報價手法都「別樹一格」。

話說係第三集，劇情講到香港首富方松蔭（胡楓飾）旗下嘅「一號仔」天蔭集團，公司炒燶Accumulator（I kill u later），股價大跌，散戶人踩人，由開市原來86蚊，一路狂隊到得返20.2元，情況極度慘烈，以前收市價86.8蚊計，跌幅77%！（嘩！香港首富又會畀自己隻股跌近八成囉），呢個時候，郭晉安興致勃勃咁話，等到20蚊，就同佢掃貨！

去到呢度，奇怪嘅事就開始出現啦，疑似飾演財經主播嘅李旻芳，見到天蔭股價大跌，無啦啦眼濕濕，好傷心咁話「真係令人慘不忍睹」。喂！咁似青姐當年因為滙控（005）跌到33蚊時，喺鏡頭面前喊嗰一場經典一幕嘅！

之後，林文龍就話要掃貨，股價即時由20.2銀低位反彈，到收市報40.2銀，計一計數，前收係86.8元，即係全日跌幅仍然有53.7%。不過，《再創世紀》成功創造一個神奇報價機，個升跌幅竟然以全日低位去計，當股價回升至20.4元，竟然紅燈變綠燈，見到升個箭咀（但同時見到跌76.5%），然後去到全日收市，明明跌五成幾，佢就以低位計升99%！

睇到呢一幕，李旻芳嗰吓眼濕濕，嗰句「真係令人慘不忍睹」，似乎非常貼切。

全球樓行 Dream House零距離
https://hk.feature.appledaily.com/overseasproperty