上海電影節日前開幕，有唔少港星都去咗上海宣傳自己嘅新戲，好似張智霖（Chilam）就帶埋媽咪同老婆袁詠儀（靚靚）一齊飛去上海。Chilam噚日同黃子華、佘詩曼、周柏豪等喺上海百樂門出席hmv數碼中國集團嘅活動，Chilam將會再同舊拍檔阿佘合作，繼早前嘅《常在你左右》外，下月又會合體演新片《洩密行者》，同片仲有吳鎮宇，Chilam透露自己演警察，阿佘則做記者。

今日中午12點左右，就見到Chilam兩公婆返香港，靚靚一身輕便裝，着住牛仔褸戴黑超，兩手揈揈行出閘，成個大少奶咁款，因為啲行李全部都係Chilam攞晒。

孭住背囊戴上口罩嘅Chilam，推住行李車，問佢返嚟會唔會補祝番父親節？Chilam反問：「應該要做啲咩㗎？」咁慶祝父親節，食飯就係最基本㗎啦，Chilam即話：「呢啲我成日會做㗎喎！」靚靚接住話：「如果係，日日都係父親節。」Chilam笑話：「應該封番封老毛畀我。」不過佢講完呢句之後，唔知係咪覺得自己講得太粗鄙，即刻糾正：「應該封番封利是畀我。」講完兩公婆就上車離開。