麥雅緻和老公張穎康今日首次夫妻檔上陣搵真銀，在置富都會出席B.Duck X mentos甜蜜樂園開幕活動，兩公婆在台上互動分享夫妻相處之道，其中一個協定係鬧交時不准提分手及離婚字眼。麥雅緻帶病發燒上陣，張穎康則要表演唱歌，心情十分緊張，佢笑言:「平時通常飲大兩杯情況下先唱歌，今次係第一次清醒之下去唱。」 麥雅緻笑老公緊張過拍劇。

兩夫妻希望每星期都有夫妻檔搵錢機會，張穎康話:「我地冇計個人收入，計家庭收入，亦習慣上繳太太。」麥雅緻持家有道，佢話:「會俾老公一日一百元零用錢，其餘我包入油、同其他伙食。」張穎康指太太此舉想杜絕他有多餘錢買紅酒飲，有時要儲兩日錢先夠買酒，婚後亦習慣一百元一日生活模式，還笑言:「咁多年都冇加過價，太太冇跟通脹，佢搵得多過我，上繳都係一個好方法。」麥雅緻話婚前有補貼老公，現時日常生活開飯亦由她埋單管理，唔覺得老公好慘。