當年今日
關於我們

隔牆有耳:狼太立會遇險越叫越走 - 李八方

蘋果日報 2012/07/17 00:00


羅范椒芬早前接受傳媒訪問時,聲稱狼振英山頂豪宅僭建嘅花架,始作俑者其實係狼太唐青儀,堅持狼振英唔知情,將罪名推晒落狼太身上。明明係正印,竟然畀個宮廷「紅顏」大踢爆,狼太係咪應該為自己平反吓先?點知噚日現身立法會答問大會嘅狼太就越叫越走,上演一齣慌忙逃難嘅《狼太遇險記》。
提早五分鐘到場嘅狼太,現身VIP觀眾席初期好風騷,先後同坐喺附近嘅行政會議成員史美倫及胡紅玉等握手。兩點半答問大會開始,狼太就帶晒耳機專心聽老公發言,對另一半嘅「官式」發言表現得相當滿意。
答問大會完結後,一班行會成員即時閃人,驚死畀記者捉住要為狼振英講好話;點知大家鳥獸散之時,竟然唔覺意「賴低」咗狼太,成班記者梗係轉移目標,趨前將香港第一夫人包圍,問僭建花架到底係咪佢嘅主意?點知狼太慌失失,騰雞之際惟有折返VIP觀眾席諗解圍辦法。
最終狼太拎住部手機猛咁篤,疑似call馬幫拖,因為十幾名立法會保安大員其後殺到;但狼太可能被嚇到神不守舍,竟然喺救兵嚟到後都唔即時閃,呆坐咗成五分鐘先走。一見狼太起身,保安員就組成人鏈,護送佢由觀景廊「運路」離開。堂堂特首夫人,與其慌亂敗走立會,何不大方見傳媒;唔通講真話,真係咁難?
mailto:[email protected]