陳潔靈（Elisa）、李日朗（Don）、梁釗鋒同劉倩婷等，今日喺油麻地出席網上平台「Movie家+新聞發佈會」，呢個平台製作出一系列關懷長者節目，並搵嚟Elisa為節目唱主題曲《家》， Elisa話：「呢個節目好有意思，我能夠將音樂投入喺社會上，希望可以令人與人相處更和諧。我爸爸就嚟100歲，媽媽就嚟90，都要處理佢哋關係，學先修身後齊家。」

提到下月18號喺演藝舉行嘅演唱會，Elisa透露自己會做監製，而倫永亮就係演唱會顧問，佢話：「以前倫永亮做監製聽唔到我唱得好唔好，今次如果佢做顧問，佢可以話我知邊啲唱得好，邊度唱得唔好。」記者笑問倫永亮都敢品評妳？Elisa話：「我喺佢面前都係學生，我平時做老師都當自己係學生，因為教學相長嘛。」而Elisa仲話呢排都有睇吓黃秋生同又一山人嘅訪問同資料，啟發演唱會嘅創作，佢仲讚秋生有學歷又有智慧，個人好有深度。

另外，阿Don正籌備拍攝有關傳承嘅短片，同樣係關懷長者嘅題目，而佢屋企就有位80幾歲婆婆，阿Don笑言當婆婆係大姐姐，佢話：「我當媽媽係姐姐，婆婆係大姐姐，我婆婆好活潑，佢食自助餐最鍾意食生蠔。」

精選娛聞，喺晒《娛果》
http://fb.com/appledailyent