當年今日
關於我們

【轉會講場】文迪勁過獲加點止5億? 摩納哥㩒住曼城搶

蘋果日報 2017/07/21 06:38

曼城熱刺摩納哥基爾獲加丹尼路雷斯班捷文文迪

曼城俾人當水魚㩒住搶!自英格蘭國腳右閘基爾獲加以5,000萬鎊(約5億港元)加盟後,曼城可謂訂下「水魚價」嘅新基準,尤其是佢哋今夏放走晒沙格拿、薩巴列達、基捷基治同捷西斯拿華斯,邊線依然求才若渴,除咗睇中皇家馬德里右閘丹尼路雷斯,效力摩納哥嘅新晉法國國腳班捷文文迪同樣係心頭好。最怕貨比貨,據報摩納哥認為23歲嘅文迪身價理應高於獲加,所以已經拒絕曼城4,450萬鎊(約4.45億港元)嘅報價,仲話起碼要5,400萬鎊(約5.4億港元)先收貨!對於轉會不成,文迪似乎欲言又止,喺社交網站做出「o殊嘴」手勢,唔知點解呢?
另外,基爾獲加轉投曼城後當然要賣吓口乖,話嚟到「藍月」奪冠優勢大咗喎:「藉着呢個領隊同球員班底,我哋需要爭取殊榮,亦係我嚟到呢度嘅目標。過去兩季喺熱刺同錦標擦身而過,我覺得有時真係唔好彩,有時就係差咗嗰少少優勢。」