雨僑早前與老公羅力威到大阪度蜜月，怎料二人遇上颱風「飛燕」吹襲日本，令到二人滯留大阪，雨僑亦曾於網上尋求資訊，想了解如何返港(新聞連結： https://bit.ly/2NZHEx5 )，今日佢哋終於能安全返抵香港。

雨僑與羅力威坐原定下午4時20分，由日本宮崎返香港嘅香港航空，航機於晚上7時50分，與三名朋友一同抵港，二人見到有傳媒接機，即停下來接受訪問，雨僑指今次能安全返港，真的鬆一口氣，她說：「我哋喺整個過程入面，都覺得好幸運，慶幸我哋能夠返到香港，因為之前都唔知幾時先可以返到香港，原訂9月7日返港，但當日知道打風時，市面環境都好混亂，亦知道我哋未必能預期返港，朋友之間都諗辦法點樣返嚟，最終我哋買咗機票，喺九州嘅宮崎縣，由大阪坐內陸機到宮崎，再坐直航返香港。今次真係好幸運，因為喺宮崎買機票返香港，都只係用番正常機票嘅價錢，約2千港圓，若果遲多少少去買，已經變成要1萬4千港圓一張。」

佢哋表示自己好彩買到大阪去宮崎嘅內陸機，仲形容係最後一刻先買到：「我哋仲要係最後幾個位，我哋覺得自己好幸運，因為住嘅酒店喺打風期間都照常營業、亦有水電供應，因為知道大阪周邊地區有酒店係停電。」問到有冇打亂本來嘅行程，羅力威就話：「應該去嘅景點我哋都去咗，第一日去咗環球影城，但去完之後就知道成個景點close咗，如果有機會都想同太太去多次宮崎，今次都係一個好寶貴同難忘嘅經歷。」而羅力威亦補充，一直未有透露訂了由宮崎返港嘅消息，係唔想幸災樂禍，並非刻意唔講。

至於因為遲咗返香港，問到兩人對工作有冇影響，雨僑話：「今日返嚟都ok嘅，如果今日番唔到，最快都要去到10幾號先番到香港，自己工作暫時都冇影響。」兩人又透露，去到宮崎一早已到機場排隊check in時已見人龍：「可能佢哋都驚機票會超賣而上唔到機，所以就盡早去排隊。」訪問後，羅力威同雨僑就同朋友慢慢推住行李離開機場，臨走前仲同記者講「辛苦晒、bye bye」。

精選娛聞，喺晒《娛果》
http://fb.com/appledailyent