【旺角】走吓一個，走吓又一個，連無綫自己親手栽培出來的「巨聲幫」羅孝勇（Sheldon）都決定要離開外闖，Sheldon在2010年加入《超級巨聲2》得到季軍，之後簽約無綫5年，慘被投閒置散，所以他下定決心要離開無綫，與此同時，他跟拍拖一年的美籍索模女友Jamie據知亦已分手，令Sheldon慘變雙失青年。
羅孝勇於澳洲長大，祖父為著名粵劇作曲家羅寶生，父親是生意人，因遺傳祖父藝術細胞，他鍾愛音樂藝術，大學畢業回流香港，加入無綫及簽約星娛樂，但只是做過劇集路人甲，主持青少年節目《激優一族》和明珠台《港生活．港享受》，故本月約滿無綫後決定不再續約。

孤伶伶買外賣

昨日Sheldon在旺角寓所外出，被本報拍到他一身便服加黑超，木無表情到茶餐廳買燒味飯，然後到便利店買果汁。本報聯絡Sheldon問他是否約滿？他接受本報電話訪問說：「其實我嚟緊係約滿，之後打算都仲諗緊，暫時唔係咁方便講，唔好意思。」
羅孝勇當年跟胡鴻鈞為了林欣彤爭風呷醋，最後Sheldon被揭跟林欣彤搞地下情，不過戀情前年玩完，去年Sheldon撻着美國來港的E Cup索模Jamie，Jamie還擔任羅孝勇MV女主角又攬又錫，早前亦被拍到二人在餐廳撐枱腳，但據知情人透露，二人原來已經分手，對此羅孝勇亦承認：「其實係分咗手一段時間，但我哋都仲係朋友，我哋都想keep private，希望可以畀啲空間我哋啦！」
採訪、攝影：小米、羅德光