年半前上市的閱文（772），招股萬人空巷，挾著騰訊（700）親生仔之名，上市當日成功爆升一倍，高見110蚊，雖然市盈率逾百倍，但不少人仍然覺得有買貴冇買錯，可惜當天的110蚊，就是上市至今的最高位，這18個月以來只得一個方向，就是向下，上月底旗下網站因涉及不雅內容而被整改，創歷史新低29.40元，高位跌咗73%。

閱文周一宣佈，將動用不超過5億元回購股份，指現時股份價值被低估，相比手持現金83億人仔，綽綽有餘啦，新經濟股跌到反艇之後出手回購，雷蛇（1337）便是其一，早前亦炒過一轉，由低位彈一倍，市值大咁多的閱文，是否值得憧憬呢？

由高位跌七成後，估值由天價回歸現實，今年預測市盈率約21倍，貼地好多，但估值正常唔代表會炒，而今次高調宣佈回購，挾淡味甚濃。閱文股價在去年8月開始缺堤，從那時開始沽空盤就大增，沽空量經常佔當日成交量的25%以上，以今年1月為例，只有一天的沽空量，少於當天的25%成交，講近啲，上周四的沽空更佔當日的55%成交，真誇張。

空軍看淡的原因青冰唔知，但閱文專登出份通告話要回購，就好有決心，因為公司在上月中的周年股東會，已循例授權作批股及回購，其實係可以直接在市場買完再申報，沒必要事先張揚出個通告嘅，所以管理層可能向空軍釋出訊號，喂食飽要離場喇。證監會網站刊出的累積沽空量，截至5月底，有3365萬股未平倉，佔總股本3.2%，其實唔少架，不過今年3月中時，這個數字見過4,500萬股，當時股價係約39蚊，換言之，這兩個月空軍已陸續食糊。

由於回購有價格限制，閱文在周二未能到價回購，周三執筆之時已到價，唔知有冇出手呢，空軍收兵加回購，看來有機會在六月跑贏大市。

青冰
http://www.fb.com/chingbing888
-----------------------------
【新聞有價】6月17日起 繼續撐蘋果
http://bit.ly/2IJ24ZR