今年都過咗一大半，樂壇新人唔係咁多，數嚟數去都係鍾舒漫、洪卓立同組合Hotcha。原來金牌經理人黃柏高（Paco）今年會力捧好多新人，除咗講實力唔講樣嘅小肥同埋組合Rubber之外，原來佢仲打算狂谷女新人唐素琪（Chelsea）。
Chelsea係舊年《美女廚房》入面美女廚神三甲之一，當時佢叫Suki，監製雷頌德覺得佢個名普通，於是就幫佢改咗個名，早前古巨基舉行音樂會時，Chelsea就擔任嘉賓初試啼聲，反應都唔錯。聽講Chelsea𠵱家喺雷頌德嘅監控下，日日喺錄音室練歌錄音，而Paco都幫Chelsea接咗個打印機大客，拍廣告配合大型宣傳，等Chelsea錄好歌同廣告出嘅時候一鳴驚人。

早幾日，Chelsea喺海港城去買咖啡，其間有兩個助手服侍佢，之後就行咗入附近一間髮型屋。逗留咗一個鐘後，Chelsea頭髮由攣變直，佢一行出嚟，就有幾個fans叫佢簽名，Chelsea都未正式出道，就有助手又有fans咁巴閉？記者同Chelsea傾咗幾句，佢好有禮貌咁解釋話啲fans喺佢做model時已經跟佢。問佢知唔知鄧麗欣（Stephy）喺公司好得寵，驚唔驚外間攞佢哋嚟比較？Chelsea就話：「Stephy唱歌好聽又識做戲，文采好創作又叻，我一直都好欣賞佢，仲想跟佢學嘢。」咁識講嘢，唔怪得Paco要力捧啦。