當年今日

求驗客手記:詐傷偷笑唔專業
雷斯演技肥佬

蘋果日報 2013/05/07 00:00


周星馳喺《喜劇之王》入面講過:「一日導演未嗌cut,我都係一條死屍,係唔可以郁。」呢啲就係專業嘅演員,但我求大俠覺得大衛雷斯喺星期日嘅演出非常唔專業,球證都未畀牌就已經偷笑,難怪有網民提議佢過檔巴塞隆拿深造。
周日英超,車路士領先緊曼聯1:0。88分鐘,腳法唔錯嘅大衛雷斯拖延時間,護住個波慢慢嚟;拉菲爾達施華就好心急,不斷壓迫,最後佢冇晒計,一時火起踢跌雷斯。雷斯立刻倒地,轆到場邊,睇落非常痛苦,但佢交唔足戲,一轉身竟然偷笑。以為冇人睇到?𠵱家全世界都笑緊你!我求大俠都知,引到拉菲爾犯規係好興奮,但做戲點都要做全套,既然跌得就要好痛苦咁跌先啱劇本!咁叫導演點收貨呢!
empty
費Sir:實在太差
曼聯領隊費格遜狂踩雷斯:「雖然拉菲爾呢吓係報復,但雷斯先對佢兩度開踭,之後就扮到成隻就死嘅天鵝咁轆嚟轆去,佢嗰陣仲識笑㖭㗎!實在太差!咁算係專業咩!」車路士領隊賓尼迪斯都冇眼睇:「冇睇到件事,亦冇睇重播。每周英超發生幾百件事,我唔講咁多嘞!」
不過,球證韋比似乎好欣賞雷斯嘅表現,突然「倒戈」,冇撐到盛傳係佢愛隊嘅曼聯,反而送咗紅魔今季英超首張紅牌畀拉菲爾。雷斯呢幕轆地偷笑引嚟好多網民討論,有人讚佢潛質優厚,可以挑戰巴塞布斯基斯嘅影帝之位;但有人話佢演技未夠班,要去巴塞跟丹尼爾同布斯基斯學吓嘢。
朗尼冇心踢hea爆
另外,曼聯嘅菲爾鍾斯無啦啦畀桑馬達射門省中,計咗做佢烏龍;佢又話啲人係咁惡搞佢對曼城嗰陣個「O嘴」樣,搞到佢好困擾,相信係最無辜嘅悲劇人物。前鋒朗尼就最hea,難得老婆同屋企人嚟捧場,但佢後備出嚟冇腳好波!做戲又好,踢波又好,冇heart真係最不該!今場最落力嘅就係39歲嘅傑斯,佢老人家踢足全場,跑咗過萬米,但始終年紀大,好多嘢都有心無力。
照蒲
輸波似乎冇影響曼聯球員嘅心情,佢哋周日夜晚返到曼市後照樣夜蒲!報道話,尹佩斯等10名紅魔兵一齊出動,玩到第二朝天光,而艾舒利楊格更加撐住拐杖都嚟蒲,真係小心身體喎。
知多啲:最佳演員:布斯基斯
喺2010年,巴塞中場布斯基斯呢吓經典偷望令佢榮登影帝寶座。雖然蘇亞雷斯同艾舒利楊格等好戲之人近年不斷推出新作品,但仍然威脅唔到布斯基斯,嚟緊就睇吓大衛雷斯做唔做到。
巴塞盛產好演員
09/10球季嘅歐聯4強次回合,國米中場莫達嘅手輕輕掃到布斯基斯臉頰,後者掩臉倒地,但佢喺痛苦之中都不忘單眼偷望球證有冇畀牌。莫達最終都畀球證趕出場。雖然呢場巴塞贏踢少個嘅國米1:0,但兩回合輸2:3出局。
巴塞右閘丹尼爾亦以演技聞名,喺10/11球季嘅歐聯4強首回合,佢被皇馬嘅比比踩中,傷到出場治理;而比比就領紅。不過慢鏡見到丹尼爾其實避開咗比比。由於巴塞盛產好戲之人,有網民戲稱他們為拉瑪西亞演藝學院。