本欄講過前日大市在樓市被打壓的環境下，尚可以站得住腳，算係做得唔錯，不過大戶心意難以猜測，因此自己亦有提醒讀者唔可以單看一日半日的表現，言猶在耳，昨日便來個大跌市，期指最多曾下跌724點，尾市跌幅只係稍為收窄，23000點最終未能守住。
昨日在開市時其實有點反常，因為前晚美股收市只微跌25點，A股開市跌幅亦不大，但港股卻裂口下跌，其實大市在月頭見頂後，這輪跌勢中都出現過數次裂口低開，不過都可以即日回補，昨日是近期第一次無法即日回補裂口，或多或少可以反映投資者開始恐慌。大市低開後就跟着A股尋底，當下午傳出南北韓開火後，即使A股尾市由低位反彈40點，都無助港股止住跌勢。

倘穿22808　調整勢更深

經過兩個多月的升市，大市終於首次沾50天線，筆者講過無論個牛市有幾勇猛，始終會有一下比較急的調整沾50天線，而且坊間提出的支持位往往一係唔到，一係就穿突，到了現階段大市真的跌了下來，大家反而唔應該被恐懼拖住走，而是要諗之後應該點去應市，好似要買甚麼股票、期指期權的策略等。現階段士佳會視上月低位22808為一關鍵，若然之後幾日守得住，我便會轉得進取一點，假若跌穿，亦非代表大市已見頂，只是調整可能會再深一點。
至於買貨對象，應屬於在此輪跌勢中仍然企得穩，或者已領先大市，自行破頂的個股，好像東岳（189）就是其中一員。東岳是中國最大型製冷劑及含氟聚合物的生產商，亦是全球第二間成功開發離子交換膜的公司，其離子交換膜於剛過去的上海世博中展出，預料在2011年將會成為盈利增長動力，而其含氟聚合物業務收入過去一年亦大幅增長，具備新材料概念下，實值得投資者望多幾眼。筆者及客戶持有東岳

張士佳
寶來證券（香港）董事　投資服務部
mailto:[email protected]