馬大少始終要告別北京！過去6季效力中國CBA北京隊、為球隊3總冠軍嘅前NBA球星馬貝利（Stephon Marbury），早前透露有意打多一季，但由於合約最後一年係球隊選項，去向要交畀一直想佢退役轉做教練嘅球隊決定。時至周六終於有分曉，北京喺記者會上宣佈，球隊決定放棄執行馬貝利嘅合約選項，同意畀呢位40歲老將離隊，又透露馬貝利開出高薪條件先肯做球員兼教練，最終以重建球隊為由決定放棄馬大少。

不過，馬貝利近季喺北京嘅表現有目共睹，唔少網民都為佢抱不平，斥責球隊兔死狗烹。無論如何，馬貝利亦喺微博上載離隊感言多謝球迷支持，但講法同球隊有出入，因為佢表示自己不甘上季未能進入季後賽，希望恢復健康拼多一季，所以不惜減薪20%以上都要繼續打落去，但最終未能如願：「無論我在那裏，我都是北京人。北京都是我的家。在一名老將職業生涯最後的節點上，我感謝所有的理解……最感謝的，是所有給予我第二次生命的球迷們，感謝你們。」