曾出演韓國人氣親子節目《超人回來了》嘅男星宋一國同三胞胎，雖然已經退出節目，但關注度仍然高。上月初有報道指四父子將陪媽咪鄭勝妍到法國巴黎研修，大概喺當地居住1年，所以宋一國就要做「空中飛人」來往法國及韓國，繼續其演藝事業。

據知宋一國一家五口於上月20號喺韓國出發，當日更有粉絲喺機場捕獲到三胞胎，宋一國更親切向粉絲打招呼。人氣勁高嘅三胞胎近日就被粉絲捕獲到喺巴黎嘅近況，據粉絲公開嘅相可見，大韓同民國拖住兩個叔叔排隊等入場參觀羅浮宮，現場未見細佬萬歲及老竇宋一國，不過就算老竇唔喺身邊，大韓、民國都依然好乖咁排隊，冇吵吵鬧鬧。