平時喺歐洲賽場見到啲人放煙花，通常都係球迷搞事，亂咁掟煙花落球場或觀眾席，但要好似維港煙花匯演嗰隻，就真係冇見過。不過，最近喺非洲阿爾及利亞一場盃賽準決賽，就出現咗咁靚嘅場景。

呢場由CR Belouizdad（CRB）對USM Bel-Abbes嘅比賽，球場附近一座大樓突然喺比賽期間，有幾個唔同單位嘅窗口位開始噴出煙花，喺上空四射，維持咗都有成一分鐘咁耐，應該係有球迷事先安排好，但據聞啲煙花碎就跌咗落啲觀眾席同球場內，好彩冇造成咩災難。

雖然有煙花助興，但呢場波就好沉悶，0:0收場，最後CRB憑互射12碼入決賽。