秋風起港股肥！踏入10月港股升到嘭嘭聲，個市咁旺場，華華即刻call吓班老友，睇吓有無人「萬歲」請食晏喇！但世事無絕對，打到畀許照中（圖）（僑豐金融行政總裁）嗰陣，華華先知道，個市好，原來經紀係會無啖好食！而黑手，竟然係耀才證券（1428）「低至一滴」策略！
「一滴」，係行內術語，意謂經紀佣金0.01%，而行頭正常佣金係0.25%，所以老許狂呻俾佢哋搞亂檔玩死！咁耀才係咪真係咁勁呢？華華於是向其他經紀收收風，佢哋話家收一滴、兩滴、三滴嘅「AE」（營業代表）都有，視乎你畀幾多生意佢做，總之就薄利多銷，寧可做到無停手，之不過要薄利多銷，啲「AE」難免問經紀行要多啲資金，所以經紀行話事人都幾頭痕，事關唔想啲「AE」跳槽，拆賬比例又要傾過，但風險又多咗！