【新增回應】
原本謝霆鋒、陳偉霆同小S去石硤尾街增煇菜館外面拍攝煮嘢食場面，就咁喺行人路擺六張枱，同搭咗個臨時廚房，門口仲有好多婆婆等緊。由於場面混亂，班老人家企咗好耐，都冇人理…

呢班婆婆五點半就嚟到等食飯，不過喺門口企住等到7點幾都仲未有得食，婆婆仲話餐飯會食到十點半，問婆婆點解食到咁夜，佢就話唔知。

咁多老人家等到耐，一班工作人員就當佢哋無到，冇理過天氣有幾熱、老人家有幾口乾、企到有幾攰，《蘋果》記者問到工作人員，知唔知老人家們五點幾就到咗企喺度等，工作人員就回覆：「唔好意思，唔好意思，我哋一陣搵人聯絡你吖。」之後就唔見咗，記者只可以同老人家們一齊等，等到七點半先入座咋。

老人家們罰企近兩粒鐘先入座，霆鋒經理人霍汶希（Mani）今日回覆《蘋果》時話：「其實呢餐飯正式係7點半開飯，霆鋒同米之蓮大廚Vicky PK戰，一齊喺兩小時炮製6道美食招呼約一百位長者同基層家庭，希望為佢哋提供美食。同時表揚明哥關心社會呢份精神，希望帶出呢個訊息。整個活動由義工團體做安排，劇組係應旅遊協會邀請。」

有份等食飯嘅婆婆向記者表示，工作人員曾經提醒五點半要到現場，仲要搭的士趕赴現場，甚至企到好攰，仲要問附近嘅店舖借櫈坐。不過呢，劇組方面就透露預料唔到老人家們心急早到霸位，先令工作人員措手不及，但都有婆婆向記者表示，全程啲工作人員都冇理過佢哋。