【羅生門】被指欠租兼整爛地板 陳展鵬反稱業主屢違承諾
業主陳展鵬收樓
視帝陳展鵬今日成為新聞人物,事緣有周刊報道指,陳於2017年喺將軍澳維景灣畔月租三萬租咗個三房嘅高層單位,本來一般住宅租約都係一年生約、一年死約,不過陳展鵬要求業主同佢簽兩年約,最後雙方達成共識,租約直至19年4月30日先結束。但今年年初,業主指陳展鵬以家中地板撬起令陳媽媽跌倒為由,加上認為單位不愁沒租客,故決定住到五月就會搬走。
業主接受周刊訪問時稱,指摘陳展鵬母子不止未有履行合約、且欠交最後一個月嘅租金,又一直聯絡不上。最後業主搵咗管理處同議員上門收樓,發覺屋企有地板變黑發霉,又發現陳展鵬在未有通知下,鑽咗兩個入牆架、窗簾掛架、走廊天花仲鑽咗一個有五蚊咁大嘅窿,報道稱業主大為震怒,直斥陳展鵬「無賴」。周刊就此事向陳展鵬求證,陳聲言一切已跟足程序做,並已交由律師處理。
今日陳展鵬現身無綫活動,之前先接受傳媒訪問,澄清事件。陳表示自己可能有做得唔好嘅地方,但業主利用其藝人身份見報,其手法值得商榷。
陳展鵬謂一切交由律師處理,又否認整爛地板及欠租。至於報道中的爛地板相片,陳展鵬表示係數月前發現地板出問題,故影低send俾業主睇嘅。
陳又稱,最初睇樓時,認為單位內入牆櫃唔啱位,業主就話,如果佢哋真係想租,咁拆晒啲櫃都OK。但入牆櫃一拆完,牆紙就「被」晒,業主卻原封不動咁擺喺度,亦未有處理電掣,陳展鵬惟自掏腰包搵師傅整。
搞完一輪又發現屋企電掣成日跳Fuse,問業主,對方回覆:「係咁0架,你自己搞啦,如果唔係我搵師傅上嚟整。」但從來未兌現。
最後陳展鵬澄清,合約條明寫明,若一年內租客不滿意,一個月通知就可以搬走。
事件發展至此,陳展鵬最擔心係佢媽咪嘅健康,他形容陳媽媽呢半年情況不大好,但未查到原因。陳展鵬表示:「最緊要係佢嘅健康,其他嘅嘢其實冇所謂。」