《風水輪樓睇》直擊華懋朗城滙一個低層單位，由於單位位處極低層，業主擔心風水差，但原來無心插柳係唔錯。術數家蔣匡文指，單位沒有「火燒心」的毛病，而且外圍環境不錯，惟旺名氣不旺財。業主想有返少少財運，惟有在單位財位擺流動水。另外，還有4年轉入下元九運（2024至2043年），旺南面有山、北面有水的地方，例如港島區、馬鞍山烏溪沙、元朗等地區，而元朗山貝河把整區風水分河東和河西，九運期間河西旺過河東，以樓盤為例，朗城滙好過長實（1113）世宙。

蔣匡文相信，元朗區在當年開發時曾經獲高人指點風水，「元朗大馬路係正東西向，整個區主要係正南北東西向，一路以來係好興旺。東面係凹頭，呢個高咗（出）嚟嘅山高過元朗市中心。東面適當方位有高山，代表呢度啲人好武功。點解古代圍村要咁做，因為拳頭在近，官府在遠，要保家衞園。武亦代表武職，所以呢度好多起樓、起丁屋、汽車呢啲武嘅行業。」

他續指，元朗西北面是丫髻山，為著名鄧氏墓穴「仙人大座」及「玉女拜堂」所在地，西南面為元朗公園的小山丘，形成乾（西北）坤（西南）方位都有座山，是乾坤大會的格局，「呢個大格局嚟㗎，中國好多大城市都係咁佈局。

前港督府（現為禮賓府）西南方就是扯旗山，開門向西南方，係『乾山乾向水流乾』嘅好風水格局。」現在元朗西南面遠望可見屯門青山，然後睇近一點是元朗公園，公園有座百鳥塔，由遠山到小山丘，再由小山丘百鳥塔到元朗市中心，「一層一層咁落嚟就係『層層下殿』，容易出小官、鄉紳、專業人士、律師、議員等等。」

他指，即將進入的九運（2024至2043年）是旺南面有山、北面有水的地方，而元朗南面有山，北面是深圳河，符合九運格局，將會越來越旺。風水是睇風和水，旺氣會被風吹散，旺氣去到有水的地方會停止，而元朗大坑渠，這條位於元朗市中心的是一條河又好，渠又好，水由南面向北流，並將整個元朗風水分成河東和河西，九運期間河西會好過河東，即丁運及財運都比較好。

走入河西的新盤朗城滙，直擊3座低層單位，業主就擔心單位位處極低層風水會否較差。蔣匡文睇完就話：「間屋好處係無『火燒心』，但仍有穿心煞，即大門可直望至露台窗口，容易財來財去，用高櫃或屏風做阻隔就得。」單位是窗向西南門向東北，「座向唔靚，門開得唔靚，開咗粒文昌星，無錢囉，淨係有名。（有名咪有利囉？）未必㗎喎，譬如好多清官夠有名囉，無財㗎。」

上述單位位處低層，反而是好事。蔣指，這一座越低越好，越高就越容易犯上孤峯獨聳的風水毛病，即是出外少人幫助，凡事親力親為。剛好單位外望前後左右佈局也不錯，左面有高樓且貼近，右面高樓較疏遠，形成一個「U」形包住間屋，同時前面遠望屯門青山，近望元朗百鳥塔，與整個地區一樣食到「層層下殿」佳局。窗外樓下正是街邊凹形停車場，變成單位的明堂有聚財作用。旁邊一條山貝河，雖然有人話臭，但至多從事一些較市井業務，例如飲食、百貨公司，就不是替高科技公司做會計。

業主想添丁發財，蔣說，主人房睡床擺啱位就可以有利丁運，至於催財方法一招已足夠，「配一配業主的命格，喺財位擺會流動的水增加財運。擺水有竅門，好多時有人整到好似瀑布咁，但水有聲就叫破，就唔啱。古人就擺一個大的魚缸，擺幾條魚入去游就動水。」他指，坊間有不少流動水的擺設，注意不要有水聲。總括而言，「除咗門開得麻麻地，其他嘢都可以接受，但旺名就唔旺財，惟有室內財位擺流動的水。」

《風水輪樓睇》準備去睇二手樓，歡迎讀者提供天水圍嘉湖山莊、新居屋、綠置居、觀塘觀月‧樺峯等單位予本報睇風水，費用全免。有意者請把單位詳細資料，包括座數、樓層及室號，以及個人聯絡方法包括手機號碼，電郵至[email protected]，註明「風水輪樓睇」。

-----------------------------

股榮醒你八隻新經濟必買股

瑞通翁世權、雷神教輪證技巧

點擊參加【新經濟浪潮 股輪淘金術】網上FAN享會

-----------------------------

掌握理財智慧 感受生活品味

investMAN全新網頁 優雅登場

-----------------------------

【全球樓行】 Dream House零距離

屬於香港人的移民攻略

-----------------------------

上車必讀天書 「九成按」入市懶人包

點擊即睇《按揭必讀手冊》電子書

----------------------------

支持蘋果深度報道，深入社區，踢爆權貴，即Like蘋果專題及調查組FB專頁！