被譽為科幻神劇嘅《黑鏡》（Black Mirror），即將於29號首播，今次分為6個單元，每部獨立，感覺就好似有6部迷你電影一樣。其實自從《黑鏡》被美國公司Netflix買咗之後，以往嘅英國味道都慢慢減淡，隨之而嚟嘅就係加入美國元素，當然呢樣就有辣有唔辣。例如其中一集《暗黑博物館》（Black Museum）咁，一開始就以公路電影作開始，女主角橫越美國西部大沙漠，去到一間奇怪博物館，從而誤打誤撞展開恐怖之旅。故事中話到佢係一個去美國旅遊嘅英國人，所以場景套路都以美國作背景。心水清嘅觀眾應該會發現呢兩季《黑鏡》其實已經將主場景由英國搬去美國，呢樣對於英劇迷嚟講未必係好事，始終大家都係由英劇背景開始睇，尤其係第一季第一集大玩英國首相同豬做愛嘅諷刺情節，呢啲英國文化可謂成就出《黑鏡》嘅獨有味道。當然要以文化差異作挑剔都算少少雞蛋裡挑骨頭，以劇論劇嘅話，今季浸「科幻味」依然有增無減，單元《星艦卡李斯特號》（U.S.S. Callister）仲癲到玩到外太空，如果唔係咁執著於文化差異，其實今季水準都尚算keep到。

更多娛聞，喺晒《娛果》
http://fb.com/appledailyent