「Merry Merry Christmas！」《蘋果》祝各位讀者聖誕快樂！希望大家由平安夜High到去聖誕節喇！

對於「萬年單身狗」嚟講，佳節見到「街裡愛人一對對」，可能只係想唱「Lonely Lonely Christmas」，就算戴太陽眼鏡避過「閃盲」，個心都難免覺得涼一涼！咦！原來唔係心理作用呀！天文台話東北季候風正為廣東沿岸地區帶嚟清涼天氣，平安夜晚會有啲雨，市區氣溫唔過20°C，聖誕朝最低氣溫約17°C，吹和緩東至東北風，初時離岸風勢清勁。天氣涼涼哋，聖誕節就更加有氣氛啦！

相信唔少情侶今晚都會去睇燈飾兼打卡，浪漫一下！當然亦有唔少人係一家大細或者同埋一大班朋友一齊慶祝，咁就可以考慮參加大型商場舉辦嘅慶祝活動，例如apm商場今年就請嚟韓國人氣男團ONF來港助慶；尖沙咀K11商場就有多媒體藝術展覽「Christmas Art Playground」，由本地建築設計團隊AaaM同日本視覺與音樂藝術家津田翔平，聯手打造互動藝術裝置，令商場搖身一變成為聖誕藝術遊樂場。

如果大家玩夜咗，唔使擔心！唔少公共交通服務今晚都會「開通宵」！港鐵大部分路綫（東鐵線往羅湖及落馬洲除外）都會通宵運作，輕鐵路線第505、507、610、614P、615P、706及751號都會提供通宵服務。部分巴士及專線小巴路線亦會加強或延長服務，部份巴士亦會改道及封閉部份巴士站，詳情可參閱運輸署網頁 及有關巴士公司網站。此外，往來中環及尖沙咀的渡輪服務也會於聖誕期間延長至凌晨1時。

其實無論有幾多人一齊慶祝，聖誕都係一個普天同慶嘅節目，希望大家都可以好好享受佳節啦！