喺大家為劉曉波發聲之際，民建聯則搵孔子做擋箭牌，陳鑑林提出「推廣儒家哲學思想」動議辯論，八方聽聞唔少議員知道後都O嘴，官員更加頭，最好由民記自己友德成局長負責應酬啦，否則一班讀番書高官真係無言以對。
陳鑑林認為要推廣儒學，係因為社會道德觀念薄弱，倫理關係疏離，社會正確價值觀混亂，家庭暴力、虐兒事件頻生，青少年吸毒、濫藥、援交問題嚴重，佢認為復興儒家哲理，可以重建社會秩序同和諧，建議喺學校同專上院校設立德育課程，着重修身，最好將孔誕定為孔子日，確立孔子思想喺香港嘅地位。
香港孔教人士爭取孔誕成為法定假期多年，不過老闆認為放多日假唔着數，因此一直唔成事，民建聯如果成功爭取到孔誕有假放，喺打工仔眼中，肯定有益有建設性過推廣儒家思想呢啲咁虛無縹緲嘅嘢。
民建聯認為社會問題叢生，要靠儒學教化人心，有冇用相信唔只八方，好多人都十分質疑，只怕又係搞統一思想、製造河蟹嘅把戲。
以史為鑑，罷黜百家，獨尊儒術都唔係乜嘢好事，民記認為儒學可以減少濫藥、授交等問題，其實好多後生仔十分明白事理，否則唔會參加元旦遊行去中聯辦示威，民建聯不妨研究吓呢個現象喎。