當年今日

隔牆有耳:民建聯擺孔子上枱 - 李八方

蘋果日報 2010/01/05 00:00


呢兩個星期立法會內外都十分熱鬧,今個星期五,反高鐵保菜園村人士呼籲大家請假都要去Big爆立法會,如果夠號召力,真係隨時萬人圍堵中環都唔出奇;下星期三仲精采,先有個休會辯論內地人越境拉人問題,再有一個要求北京釋放劉曉波嘅動議辯論,提出辯論嘅民主黨李華明話,13號當日希望80後,60後、70後同其他市民,都去立法會外集會聲援劉曉波,爭取民主自由無分年齡。
稱可重建社會秩序
喺大家為劉曉波發聲之際,民建聯則搵孔子做擋箭牌,陳鑑林提出「推廣儒家哲學思想」動議辯論,八方聽聞唔少議員知道後都O嘴,官員更加頭,最好由民記自己友德成局長負責應酬啦,否則一班讀番書高官真係無言以對。
陳鑑林認為要推廣儒學,係因為社會道德觀念薄弱,倫理關係疏離,社會正確價值觀混亂,家庭暴力、虐兒事件頻生,青少年吸毒、濫藥、援交問題嚴重,佢認為復興儒家哲理,可以重建社會秩序同和諧,建議喺學校同專上院校設立德育課程,着重修身,最好將孔誕定為孔子日,確立孔子思想喺香港嘅地位。
香港孔教人士爭取孔誕成為法定假期多年,不過老闆認為放多日假唔着數,因此一直唔成事,民建聯如果成功爭取到孔誕有假放,喺打工仔眼中,肯定有益有建設性過推廣儒家思想呢啲咁虛無縹緲嘅嘢。
民建聯認為社會問題叢生,要靠儒學教化人心,有冇用相信唔只八方,好多人都十分質疑,只怕又係搞統一思想、製造河蟹嘅把戲。
以史為鑑,罷黜百家,獨尊儒術都唔係乜嘢好事,民記認為儒學可以減少濫藥、授交等問題,其實好多後生仔十分明白事理,否則唔會參加元旦遊行去中聯辦示威,民建聯不妨研究吓呢個現象喎。
「軟實力」文化滲透
中共近年趁外國漢語熱,喺全球廣設孔子學院,名為宣揚孔教同中華文化,有人質疑只係借孔子過橋,以「軟實力」文化滲透兼統戰啫。
mailto:[email protected]