當年今日
關於我們

【男神好生猛】余德丞出院首曝光 出動歎切腩撈粗

蘋果日報 2018/09/12 16:02

出院深切治療部余德丞

【新增內容】
28歲大台新一代男神余德丞8月8號晚喺西環踢波期間,突然暈倒昏迷,佢被送往瑪麗醫院深切治療部,一度情況危殆,令人擔心。(新聞連結: https://bit.ly/2QntQ0M)余媽媽日以繼夜探訪照顧,友人集氣,加上余德丞後生,佢意志力驚人,最終大步檻過,不但甦醒,甚至離開ICU,本月7日,余德丞仲喺Instagram報喜出院,佢好感恩多謝醫護人員照顧,佢仲話:「我都希望今次之後,我嘅身體會生生性性,爭一口氣,唔好再令大家擔心。醫生話短期之內唔可以做運動住,相信都會係我最唔習慣嘅。生命無 take 2 ,今次咁好彩有多一次機會,我一定會好好珍惜。俾啲時間,等我休養多一陣,好快我就會重新出發。」(新聞連結: https://bit.ly/2Mqi5n0)
余德丞出院後一直未有公開露面,今日佢出動喇,不過就係同男性友人開車去咗筲箕灣東大街嘅安利食嘢,《蘋果》接報趕到現場,大約2點,余德丞同友人啱啱食完嘢離開,佢着住黑tee同短褲,戴住cap帽,精神唔錯,仲好生猛,只係身形明顯消瘦,佢同男友人當時食完嘢埋單走,佢哋去咗停車場攞車準備離開,余德丞仲做「柴可夫」,佢先喺銅鑼灣放低朋友,跟住自己開車返咗大坑寓所。
到底余德丞喺安利食咗乜嘢?佢喺Ig嘅限時動態分享咗,原來係店中招牌切腩撈粗同油菜,佢仲貼咗單據,店員寫上「get well soon」祝福男神。
查實余德丞出咗院之後,已經逐步回復正常生活,好似日前佢有份參演嘅新劇《鐵探》搞咗個煞科宴,雖然儀式進行嗰陣未見有佢嘅蹤影,不過佢今日喺ig貼咗張大合照,原來嗰晚佢都有現身仲留言話:「完美的落幕,慶幸有那麼愛錫我的團隊,鐵定會再次相遇,感謝!」
精選娛聞,喺晒《娛果》
http://fb.com/appledailyent
empty
攝影:黃曉程
empty
余德丞出院後一直未有公開露面,今日佢出動喇
empty
余德丞同男性友人開車去咗筲箕灣東大街嘅安利食嘢
empty
佢同男友人當時食完嘢埋單走,佢哋去咗停車場攞車準備離開
empty
余德丞喺Ig嘅限時動態分享切腩撈粗同油菜
empty
影大合照嗰陣,都未見到有余德丞嘅蹤影。
empty
原來余德丞喺儀式過後先現身活動。(ig圖片)
empty
(ig圖片)