去年特首選舉跑馬仔，獲中央支持代替梁振英出戰的林鄭月娥，被薯片陣營標籤為「CY 2.0」，曾俊華也曾在選舉論壇上質問對方知否為何被稱為「CY 2.0」，及指她一旦當選，香港或變「撕裂2.0」。林鄭正式上任一年前夕，《蘋果》上周分別在旺角及銅鑼灣抽樣訪問多名香港巿民，了解對其管治意見，例如曾被標籤「CY 2.0」的她與梁振英是否有別？普遍市民認同林鄭治內香港社會氣氛較平和，惟「雞排妹」頭號粉絲朱先生認為，林鄭與梁振英根本無分別。

記者 林俊謙

或許是上任太差，造成的對比太大，任職物流業、今年70歲的王先生提起梁振英就激動，直斥梁任內表現「係垃圾嚟」，雖則林鄭上任表現一般，至少「感覺上佢好（梁）少少，但講唔出點解」，希望林鄭能更好推動社會福利政策，令長者得到應得的福利。今年16歲、現為中學生的葉小姐坦言，林鄭上任後香港未如梁振英治下有大量遊行示威，「（梁）做嗰陣時好似多啲人會不滿或者多啲遊行，林鄭雖然大家都可能唔鍾意佢、或者唔滿意中央，但未至於咁多騷動」，但由於林鄭「都係跟中央做嘢」，故對其未來施政不存期望。

不像「CY 2.0」，相信是管治手法始終有別，殊途卻或同歸。任職教師的盤小姐指林鄭相對梁振英，管治時明顯較為「和顏悅色」，但仍是不斷收緊港人在一國兩制下的權利，「佢（林鄭）只係用一種溫和、溫水煮蛙方式，梁振英就乞人憎啲，但林鄭都係糖衣毒藥」。已退休的84歲的丘先生分析，梁振英任內用強硬、獨裁、霸道方式治港，林鄭則透過資源收買、利誘港人，直指林鄭管治一年，「我覺得香港外表上覺得好咗，但實質上仲衰過梁振英，因為佢用陰險（管治），好多人睇唔到」。

「雞排妹」鄭家純頭號粉絲朱先生今次不談鄭家純寫真集，跟大家拆解林鄭月娥施政，任職飲食業、24歲的他直指林鄭與梁振英一樣，至今未能履行選舉承諾，認為林鄭非普選產生，施政只會聽從建制派和中央要求，「佢無一樣係令我地啲後生仔受惠，我哋梗係出嚟反抗你架啦！」，坦言對特區政府「無期望就無失望，對香港政府點會有期望？」