吹神陳奕迅（Eason）最新歌曲《起點‧終站》，搵到好兄弟謝霆鋒作曲，作為Eason新碟《準備中》第二主打。

事實上，霆鋒過往創作唔少作品，但最終過唔到自己嗰關，今次難得寫歌畀Eason，更挑戰Eason高音，唱到Eason都大嗌救命，霆鋒表示：「我自己都覺得《起點‧終站》好高音，音域之闊不是一般K歌程度，而且要好戲劇性及內心世界豐富嘅人先可勝任。」

而新歌比起《浮誇》演繹得更加撕裂，Eason表示：「首歌好撕裂，要代入霆鋒角度去唱，而且係佢鍾意嘅音樂類型，最尾太高音好唔人道！」

至於新歌MV，Eason曾提議玩火或飛車，因為佢未試過，最終要求一個有質素嘅女模任女主角，該女模更穿上DeepV露背開衩裙拍MV。

Eason還大爆拍攝時趣事，其中一幕該索模為咗吸引Eason撫摸身軀，點知突然跌出「缽仔糕」，令Eason當時嚇呆，雖然Eason已見慣風浪，但呢下佢都來不及反應，只好移開視線，至於該女模就表現專業，若無其事再放好「缽仔糕」繼續拍攝，令Eason佩服。