由韓國影帝宋康昊夥拍劉海鎮及柳俊烈主演嘅韓片《逆權司機》，上月2號喺韓國上映以來大受歡迎，截至噚日其總累計入場人次高達11,863,257，打破2004年上映、由張東健及元斌主演嘅《太極旗飄揚：生死有情》嘅11,746,135累積入場人次，打入歷代票房嘅第10名。

未知《逆權司機》可唔可以再下一城，打破2005年上映、李準基主演嘅《王的男人》嘅12,302,831入場人次紀錄。另外，《逆權司機》將於本月21號喺香港公映。

另外，以韓國光州民主化運動為背景嘅《逆權司機》，除咗喺韓國大受歡迎，喺海外評價亦相當高，據知《逆權司機》有望代表韓國出戰第90屆奧斯卡最佳外語片，不過最終入圍名單要明年1月先公佈，而《逆權司機》更係宋康昊繼《思悼》及《密探》後，第三齣其主演嘅電影有望角逐奧斯卡。