白宮經濟顧問又打開口牌，希望聯儲局「即刻減息半厘」，雖然係人都知鮑威爾唔會聽佢支笛，但也可增強下半年減息預期，藉以壓低債息，降低融資成本，頂住美國經濟及股市。另一方面，中美貿談越拖越後，似要傾到2047，無他，中美經濟齊齊轉差，救市都要畀時間等藥力生效，唯有「慢慢傾」買時間。

上周個市捱過了債息倒掛的第一波衝擊，上番29,000來個完美季結。來到第二季，剛過完業績期，傳統上4月會唞一唞，大戶睇完業績計好晒數，也會趁機加馬至今年前景亮麗的股票，去年純利增長87%、主打液化天然氣（LNG）裝備的中集安瑞科（3899），短線可以吼實。

中集安瑞科主營三瓣業務：天然氣儲存設備及運輸（佔收入46%）；危險化學品儲存設備（佔29%）；液態食品加工（佔25%）。睇落絕不sexy，但卻是悶聲發大財的生意，皆因在環保大國策加持下，煤改氣、油改氣、儲氣調峰等政策穩步推進，天然氣進口量趨升，LNG裝備訂單需求有增無減。而作為全球最大的罐箱製造龍頭，市佔率高達5成以上，產品線齊備，毛利自然有一定保證。此外，公司也為果汁、啤酒等飲料提供不銹鋼加工裝備與儲罐設備，併購策略有助推動業務快速增長。

盈利前景方面，綜合中金、興證、廣發報告估算，今年中集安瑞科純利按年增長介乎26%至31%，現價預測市盈率僅13倍，估值吸引。

魏力
筆者為證監會持牌人，未持有上述股份財務權益
www.facebook.com/2012jason

=============
免費訂閱《蘋果動新聞》，無懼霸權橫行！
⇛立即登記： https://hk.adai.ly/mI4FlAPBrV
=============
《動腦Q》周末主題夜，追加星期六、日 9:30pm！
⇛日日有錢贏： https://hk.adai.ly/awLNLgSFmV