財爺曾俊華喺網誌幫港機工程（044）大賣請人廣告。港機工程舊年底發盈警，唔係因為冇生意，而係因為冇人用，唔夠熟手同半熟手技工，所以有生意都接唔到，碰啱今日中學文憑試放榜，鬍鬚曾喺網誌鼓勵學生之餘，竟然喺文尾向學生介紹飛機維修業，仲唔係幫港機幫到出晒面？！

中學文憑試（DSE）今日放榜，鬍鬚曾喺網誌例牌鼓勵學生，話自己讀書嗰陣，都試過唔知前路係點嘅嗰種迷茫，指自己喺學校唔係最聰明、最勤力或成績最好嘅學生，但勝在識得考試云云。佢又都係嗰句，指大學以外，學生仲有好多值得考慮嘅選擇。
講到呢度，佢就喺末段話「特別想向大家介紹飛機維修業」，指香港機場每日有過千班機升降，業界對飛機維修嘅人力需求非常殷切，業內培訓完備，又有完整晉升階梯，係年輕人一個不錯嘅選擇。
呢段文比廣告更廣告，差在未寫埋人工高，福利好，年終有雙糧之類咋，港機真係要多謝財爺啦，無端端幫佢大賣請人廣告，財爺都話好，仲唔係好工？

除咗港機，TVB都要多謝財爺，事關財爺講完飛機維修業，仲提到今晚有套講飛機師同飛機維修嘅電視劇首播（即係《衝上雲霄II》），佢仲期望套劇可以「感召」更多年輕人投身航空業，衝上雲霄咁話。
睇見財爺咁識硬銷，佢應該快手過兩招畀啲局長，等佢哋推銷新界東北發展、擴建堆填區時，唔使踫到一鼻灰啦。

李華華
mailto:[email protected]