上月因流感引致肺炎入院，臨時取消上月30日晚澳門演唱會嘅張敬軒，經休養後，終於喺噚晚重踏澳門金光綜藝館舞台演出，獲老闆楊受成及一眾公司兄弟姊妹捧場，佢更發現觀眾者有佢仰慕好耐嘅偶像商天娥。

澳門站流程跟香港站大致一樣，只係加入幾首新歌同新衫，嘉賓同樣係好友王菀之（Ivana）擔任，兩人喺台上對彈鋼琴合唱《井》同《留白》，Ivana身型比之前更為圓潤，惹起大家猜測係咪同老公蘇卓航（EricSo）造人成功。

入行以來首次因身體健康問題，令演唱會需要延期，大病初癒軒仔全晚表現放盡，又唱又跳又飊高音，喺台上誠懇地向無退飛再繼續捧場觀眾講「對唔住」，因為自身問題令演唱會延期帶來不便，軒仔感激製作單位同公司同事幫佢解決咗好多麻煩事項，佢話:「1月30號當晚，我戴住氧氣罩瞓喺病房，醫護人員七點幾巡完房就要我瞓，當時我諗呢個時間我應該化好妝換好衫準備上台，內心好內疚同唔開心，不過可能係上帝安排，要我調好身體做更好演唱會，希望大家感受到。」

獻唱張國榮歌曲《紅》時，軒仔同男女舞蹈員都有親暱舞步，到歌曲尾聲時，軒仔更與肌肉男面貼面至兩嘴近乎鍚，此時舞台突然熄晒燈光。於快歌環節勁舞之後，軒仔形容一眾舞蹈員係佢嘅天使，事關前一日綵排時，當做一個抬起瞓後動作時，軒仔比預定時間瞓早咗，幸好舞蹈員及時抱住佢免墜地受傷。

演唱會尾聲，軒仔特意為快將生日嘅老闆楊受成送上一曲《順流逆流》，預祝老闆身體健康，臨落台時，更感觸地話:「之前肺有病時，好驚再唱唔到歌，今晚可以再唱，我真係好幸福、好幸福、好幸福......」

軒仔喺訪問時都認同Ivana肥咗好多，同樣估佢係咪同Eric之前去日本配種成功，軒仔話:「我有問佢，佢答我冇，不過佢向來都係一味食，Eric又好鍚佢，養佢好似放喺神枱供奉咁，而佢圓潤都唔係第一日，肥膏三尺唔係一日之寒。」軒仔都相信Ivana無呃佢，因為之前見Ivana有做Gym同著高踭鞋上台，嚟緊有部戲知佢要減肥。至於同男舞蹈員最終有無鍚到，軒仔指嗰一幕係舞台效果，兩個人只係借位扮鍚。