當年今日
關於我們

黑鏡線索●歐國盃啟示

蘋果日報 2021/06/22 02:00

歐洲國家盃有燈就有人極權

同唔少香港人一樣,我對歐洲地理認識,啟蒙於睇歐洲國家盃。計埋外圍賽,有成四五十隊。好多小國平時新聞唔多報道,睇波先知,噢,原來有撻咁嘅地方。
打開地圖,其實歐洲好細吓,但有成咁多國家,而且有時仲會加多啲。最明顯例子係九十年代,歐洲共產鐵幕冧檔,東歐洗牌,結果歐洲盃多咗阿美尼亞、克羅地亞、波斯尼亞和黑山、捷克、斯洛伐克等等。
當帝國執笠,就讓出咗現代民族國家冒起嘅空間。現代國家,意思係公民有一定程度,參與管治,而唔係一盤散沙,由一小撮人話晒事。當大家有得參與管治,首先需要有足夠凝聚力,如果唔係就算投完票都會打交。人越多越難聚,所以由帝國轉型為現代國家,往往係分拆再分拆。

同文又同種 凝聚唔到就拆散

現代民族國家,所講嘅民族唔係等於血統、種族。民族唔係一齊去驗吓DNA、唔係一睇你個樣就知。民族係創作出嚟,去承載住有足夠凝聚力一齊自治嘅政治共同體。政治凝聚力,往往係基於共同理念、共同價值觀。例如瑞士,雖然有四組講唔同語言嘅人,但因為有足夠凝聚力,所以用聯邦方法走埋一齊,好過各自融入講同一語言嘅鄰國。相反,克羅地亞同埋塞爾維亞人雖然同文同種,但兩批人政治上凝聚唔到,於是拆散先可以共存。
民族創作,既有傾向拆細、有利公民參與自治嘅類型。但同時,往往有傾向兼併,鬥大嘅類型,即所謂大xx主義,例如大阿拉伯主義、大印尼主義、歐洲嘅有大奧斯曼主義、大希臘主義、大德國主義。只不過喺歐洲,最終跑出嘅,係小民族現代國家主義,所以而家好少聽到以上嘅大XX主義。
相反,喺東亞中原,晚清民族發明家梁啟超,創作出中華民族,成為大中華主義先驅。但其實係有小民族主義同佢競爭,最出名當然係毛澤東做寫手幫手宣傳嘅湖南民族主義。小民族主義曾經係威係勢,似乎將會如大家所料咁,凡事慢歐洲七十年左右,點知形勢逆轉,結果大中華膠到今時今日。

極權帝國扮現代 消費同情心

現代國家嘅「現代」,唔係指時間,而係講個模式。呢種模式,喺過去一兩百年先開始發揚光大,時間上係新,但唔代表凡係呢二百年裏面嘅國家都係現代國家。就算到咗今時今日廿一世紀,都仲有由上而下嘅極權帝國,只不過係扮現代國家,或者扮變緊做現代國家,一直消費外面嘅人嘅同情心,隻眼開隻眼閉。
民族唔一定變得成現代國家,中間往往要等、要捱、要堅持,有得而復失又有失而復得。都係好老土嗰句:念念不忘, 必有迴響,留一口氣,點一盞燈,有燈就有人。
撰文:宋漢生
fb : sunghsblog