雲格早前落實續約阿仙奴兩年，又講明今夏會花過億鎊買人，廠迷都係聽住先，周二都總算再新兵落實加盟，史浩克04後衞哥拉辛拿斯，以自由身加盟，阿仙奴官方只話簽咗長約，冇公佈實際年期。

可以擔任左閘同中堅嘅哥拉辛拿斯，都算係帶刀待衞，助攻力相當強，今季德甲攻入3個入球，同埋5個助攻，係德甲後衞組助攻王；嚟自波斯尼亞嘅佢，因為今夏同史浩克約滿，所以雲格可以免轉會費簽到佢，啱晒精打細算嘅雲爺爺。