當年今日
關於我們

隔牆有耳:學術論佔中 
戴耀廷:有商討日 有機會影響他人

蘋果日報 2013/05/25 05:20

隔牆有耳

記:《蘋果》記者
戴:戴耀廷,佔中運動發起人、香港大學法律學院副教授

辭官後曾到美國留學的葉劉,最近撰文批評戴耀廷的「港版商討日」只有認同者才可參與,排斥了持不同意見的市民,容易以偏概全。

記:如何回應葉劉的批評?
戴:如果要一個全面嘅D Day,應該由政府去做。我哋只係自己一個組織,需要做一個民主決策程序,我哋加咗一個商討日落去,加入埋random selecting去做比對,我哋其實已經做凸咗。如果葉太支持由政府主導做,我覺得可以㗎。至少佢有睇書啦。其實只要經過三次商討日,嗰個文化就會種咗落去,之後政府做任何大型政策,好似填海規劃、喺邊度起焚化爐,都要做商討日啦,佢就算唔做商討日(deliberation day),都要做商議式民調(deliberative polling)。

根據國際專家的意見,三次商討日,都要隨機抽樣100至300人做對照。第三次商討日的萬人議決後,還需要再做多一次全民投票,才可得出民間政改方案。

記:一萬名佔中參與者及300位隨機抽樣市民,分開投票,有何意義?
戴:可以睇到兩個選擇,一批係支持和平佔中嘅;另一批係抽樣,較代表到整個香港。兩批人嘅選擇可能一樣,可能唔同。當做全民投票時,大家可以知道和平佔中支持A、市民支持B,到時有個考慮。

記:如果300人支持較保守方案,一萬人支持較進步的方案,會如何處理?到時佔中支持者會否離隊?
戴:呢個情況係可能存在。但透過商討過程,正正想將唔同方案嘅優劣帶出嚟。有咗商討日,如你傾向一個開放啲嘅方案,你多咗一個機會嘗試影響其他人,你可以做游說。到咗全民投票時,你就要接受個結果,只要個公投係公平,每個人都有一票。
(商討日)同所有民主程序都一樣,你有好多人好積極去參與政黨,推動咗好多嘢,但最後都可能係選唔到,咁你唔通話呢個唔民主咩?
記:如果到最後,全港市民都有機會在全民投票表態,大家為何要花時間參與商討日?
戴:參與本身都係一種enriching experience,塑造緊一種參與文化,呢個亦係我哋想扭轉嘅一個意識。
𠵱家好多人批評西方式民主淨係得投票嗰吓嘛,咁我就要畀你參與。你唔參與,係你放棄自己權利。但有一群想參與嘅人,有個機會參與,係一個充權經驗。如果只可以得公投嗰下,係冇咗個參與途徑。有人問,民主唔係就係雙普選咩?雙普選只係一個制度,成個民主程序當中仲有好多元素,例如願意聆聽、信任,同埋商討文化。

佔中行動會有三個商討日,預計明年1月的第三次商討日,會有萬人參與,表決政改方案,然後再舉行全港性全民投票。但屆時政府是否已啟動政改諮詢,仍是未知之數。

記:如明年初政府仍未提政改方案,如何聚焦討論?
戴:我諗我哋傾咗自己方案先啦。無論佢掟乜方案出嚟,我哋先有自己嘅方案,起碼香港2020、真普聯兩個方案先啦。

記:如政府在全民投票都完結後,才推出方案,會否令你們進退維谷?
戴:呢個係最艱難時候。和平佔中,醞釀期差唔多完。D Day 1開始係裝備期,完成埋D Day 3,就進入對話期。如果佢到時先掟個方案出嚟,不合乎國際標準就唔使理佢,只可以佔領中環作終結。如果佢個方案可能係(符合國際標準)又可能唔係,咁……
我鍾意以碼頭工人談判做比喻。工人講雙位數,咪即係我哋講緊嘅國際標準囉。咁佢畀番乜嘢你?咪(加薪)9.8%加4,000蚊囉,即係乜嘢呢?佢又唔係雙位數(國際標準),但你計番條數呢,加4,000蚊,視乎你原先人工係幾多,可能啱啱過雙位數都唔定喎。
如果你話佢衰,佢畀5%你,根本唔需要煩,就佔領中環。如果佢畀9.8%加4,000蚊,可能有一部份人話唔符合國際標準,有一部份人話都有得傾喎。
呢個可能就係……李柱銘方案囉。即係李柱銘個方案,最鬼難搞就係似9.8%加4,000囉,佢又開放咗少少提名委員會,個選民基數大咗,咁你嗰時要定唔要呢?唯一可以解決呢個矛盾嘅方法,就係再公投。政改方案如果符合國際標準,泛民一定入到閘,有啲情況係唔符合國際標準,但泛民都入到閘,最詭譎係呢度。

mailto:[email protected]