王菲將於本月30日喺上海舉行「幻樂一場」演唱會，門票一粒鐘被掃清，傳聞第一排黃牛飛炒到天價100萬人民幣，前晚數字王國集團有限公司宣佈，將通過虛擬實境（VR）技術，獨家為王菲騷提供全球首次全景360網上直播，而呢間公司嘅大中華區主席，就係同王菲復合咗嘅男友謝霆鋒，果然肥水不流別人田。

短髮形象清新

數字王國喺facebook上載王菲短片，標明：「數字王國全城『獨家』！天后王菲Faye Wong現身力撐VR直播！」剪了一頭短髮嘅王菲形象清新，皮膚又白又滑，佢喺短片暗撐男友公司：「12月30日演唱會將會是全球首次VR直播的一件盛事，無論你在任何地方，都可以親身感受到現場氣氛，希望大家跟我幻樂一場。」而數字王國喺新聞稿亦冇提霆鋒係公司大中華區主席，鋒菲首度合作卻低調互撐，甜到漏。
此外，王菲騷獲得多個品牌贊助，VIP門票更獲贈唔同款嘅意大利品牌貓貓袋，有網友晒出貓貓袋，外表似足王菲嘅愛貓「灰叔」。
撰文：馮仁昭