當年今日
關於我們

【法拉戀外交官男友】前夫薛世恒稱單身「放盤」坦言想搵番個…

蘋果日報 2017/02/17 12:25

薛濟傑薛世恒薛嘉麟陳法拉

陳法拉正在紐約讀戲劇,日前抽空去咗Kate Spade 2017秋冬預展,情人節前夕,早前被爆有個法國駐日外交官男友,法拉都默認拍拖,情人節正日買咗2張Cate Blanchett舞台劇飛(新聞連結: http://bit.ly/2loaqfD ),法拉展開新戀情,不過前夫兼Neway太子爺薛世恒感情仲係交「白卷」。
今日有周刊報道薛世恒專訪,佢罕有講自己嘅生活,佢話爸爸係白手興家,所以自細喺小康之家長大,由於爸媽都要做生意,所以佢係由媽姐湊大,對於感情事,佢自從同前妻陳法拉分開後,佢一直好多緋聞,但一概冇回應,坦言嗰啲只係朋友,就算心急拍拖都唔代表可以快,佢認為神唔會安排一個好女仔俾一個壞男人,因此,佢首先想做好自己,佢認為o依家嘅自己仲有好多嘢未係最好,佢又指經歷兩段婚姻,現時要學識點同人相處、溝通,佢明白好多相處得好嘅兩公婆都係擺低咗自我中心,唔會自己睇得太重。佢又話現時係單身,坦言想搵番個共同信基督教嘅另一半,想大家有共同價值觀,好想大家以朋友方式咁相處。
外界一直傳被爸爸薛濟傑削權,重用胞弟薛嘉麟,薛世恒喺報道就話自己同家人關係幾好,又話同胞弟唔會好似啲「寵物」咁爭寵,佢同胞弟都唔需要喺個框入面爭嘢,就算爭到都冇意思,佢哋目前都有自己嘅生意,講到之前佢接手家族生意係因為爸爸去澳洲讀工商管理博士學位5年,薛世恒就話當時係阿爸畢業返嚟,佢先交番啲生意出嚟,08年離開Neway之後,佢研究過股票,點知撞正金融海嘯交咗唔少「學費」。