港英餘孽係煲呔「原罪」，由於左仔認為佢唔係「根正苗紅」，所以就算係爵士，平日都只可以喺禮賓府內被叫做阿Sir過吓癮，近日佢終於有解放機會，去到「祖家」訪問，堂堂正正光明正大做英國爵士，前日早上仲同英國首相白高敦（GordonBrown）會面。
英國同香港關係密切，𠵱家環球金融海嘯形勢仍然好凶險，煲呔去到倫敦，自然要同當地財金界人士、官員討論最新局勢。據新聞處講，兩人認為港、英監管機構有必要加強溝通合作，就國際金融架構和規管達至長期共識，因為英國同香港係全球兩個主要金融中心，必須擔當主要角色處理目前經濟情況。

一聽救民望黑面閃人

英國首相辦公室發言人透露，除咗討論金融問題，兩人亦討論G20峯會內容，比較特別係，白高敦同煲呔竟然傾到日前一艘香港註冊貨輪，喺也門被海盜騎劫一事。兩人點解會講到海盜問題呢？雙方發言人都冇解釋，八方思疑會面仲有啲嘢唔方便出街，煲呔離開唐寧街10號時，被問到一個問題時，就面燶燶離開。
據講當時有記者問煲呔，有冇向白高敦求教如何重振民望，煲呔視民望如浮雲，對提問似乎充耳不聞，兼即時黑面離開。白高敦上任後民望下跌，好似煲呔民望咁低位徘徊，但早前推出救市方案，直接注資銀行保住英國金融體系穩定後，民望隨即反彈，工黨支持度都受惠上升。
白高敦出招救市兼救人，十足英國特務007咁，化解全球危機，事實上英國推出救市方案後，白高敦即被捧為全球救市英雄，連新鮮出爐諾貝爾經濟學獎得主克魯明（PaulKrugman）都勁讚佢出手快而準，煲呔有機會見白高敦，冇理由唔請教高手，取經挽救香港經濟，收穫可能好過經濟機遇委員會吹水一輪得個桔。
況且好多人都認為香港高官冇咗英國人做「教車師傅」真係好唔掂，煲呔呢趟去到唐寧街10號取經，最好可以盡快推出實際救市措施，令市民對佢施政恢復信心，學似白高敦咁民望谷底反彈，事關佢訪問英國後，就要去秘魯出席亞太經合組織會議，有機會見到胡總，如果交唔出功課，你說怎麼辦？

mailto:[email protected]