港股昨日下跌，人人都話因為泰股大跌。不過，有股友問趙飛雲記唔得，港府上次賣地大市跌得仲恐怖，結果馬鞍山地皮成交價，較市場預期高位少咗好多億，小超人投到馬鞍山地皮後浮現少見嘅蓮子蓉口面接受訪問，猛話好滿意。
趙飛雲就唔多信呢個陰謀論，地產商因為想買平地而質低個市，而昨日山頂地皮最後由新地（016）以18億元天價投得，每呎樓面地價創4.2萬元新高紀錄，而且麵粉貴過麵包。
但股友仍然唔服氣，話港股如果噚日係升200點，地皮賣20億元以上都唔止。對於呢啲假設性問題，趙飛雲當然冇佢咁好氣。

港股要跌毋須理由

其實大市暴升咁多，要跌要調整根本毋須理由。泰國政變不久，新政府上台難免政策有變，由樂觀角度諗，外資沽貨套現走人，話唔定資金會流入香港。而且區內有外滙管制的國家曾有馬來西亞，而中國更是一直執行外滙管制，照睇泰國金融風波的影響好快會淡化，重演97年亞洲金融風暴機會甚微。
香港基本上不會出現外滙管制的問題，大市要跌亦只是大戶賺夠沽貨離場而矣！
趙飛雲反而覺得現時香港不少股票炒過龍，大行唱得太好，令投資者憧憬得太美好，一旦相關股份有期業績交不到功課，股價將難以支持高PE而被拋售，情況就似美股公布業績期，如果表現令市場失望，就算大藍籌都可以單日跌兩成。
趙飛雲