一年容易又中秋，應屆國際小姐澳門代表麥嘉欣(Sofia Paiva)，喺澳門土生土長兼講得一口流利廣東話，不如由佢講吓澳門同香港兩地過中秋有咩唔同。Sofia掛住冧死人嘅笑容話：「其實同香港冇咩分別，哈哈！」

雖然形式上兩地過中秋都係差不多，但相較香港，澳門勝在仍保留大量具特色嘅殖民地時期建築同老店，所以Sofia話坐喺教堂前空地，食住月餅賞月最有中西文化交流氣氛。 話就話兩地過中秋冇咩分別，但Sofia o依然帶我哋去大三巴前嘅手信街，揀澳門最傳統嘅月餅，佢仲好似售貨員上身咁落力解釋每種月餅嘅成份同試食添。

講到揀月餅，Sofia同時下年青人一樣，覺得傳統月餅嘅蛋黃同蓮蓉比較油膩，所以最鍾意嘅就係冰皮月餅，佢話：「我最鍾意食榴槤，又鍾意食冰皮，所以近年推出嘅榴槤冰皮月餅係我最愛，不過通常我食完都冇人會想同我講嘢。」Sofia話小朋友嘅時候，每逢臨近中秋市面都開始有大大細細嘅中秋佈置，不過今年街上嘅中秋氣氛就好似冇咁濃，尤其係澳門剛受到「天鴿」正面吹襲，目前仍然喺復原過程中：「因為早排打完風，市面仍然未完全恢復，所以我覺得今年啲佈置少咗。」

到o依家大個女，Sofia話依然習慣每年中秋都要玩燈籠，然而，今年比較少舖頭掛啲燈籠出嚟，但仍然買到佢最鍾意嘅舊式紙燈籠，佢話：「細個嘅時候每年中秋節都會迫爸爸媽媽買燈籠畀我，到依家都係一樣，分別嘅就係以前會鍾意卡通公仔，大個咗就反而鍾意以前舊式嘅紙燈籠，覺得好有味道。」每年中秋，Sofia話都會同所有屋企人一齊食飯，佢話：「所有屋企人都會去Auntie屋企食飯Gathering，食完飯之後就會上天台，欣賞吓月光同傾下偈。」咁Sofia又覺得係澳門過中秋同喺香港有咩分別？佢笑笑口話：「大家都係食月餅玩燈籠，唯一分別可能就係澳門可以放煙花，所以以前都有放過啲細細支嘅煙花。」佢仲講笑話：「如果香港嘅朋友想喺中秋放煙花，就過嚟搵我啦。」

嚟緊本月中，Sofia就要代表澳門去東京參加國際小姐比賽，佢話：「因為要去一個月，同七十幾個國家嘅佳麗一齊參加，自己心情都好緊張。」咁屋企人同男友又點睇今次比賽？佢話：「佢哋全部都好支持同鼓勵我，叫我放鬆心情。」