經典美劇《X檔案》（X-Files）兩位老拍檔「郭探員」姬莉安德遜（GillianAnderson）同「莫探員」大衞杜楚尼（DavidDuchovny），上年已宣佈再攜手合作，開拍全新一季調查曲折懸疑嘅神秘奇案，第一集就講兩位主角調查疑似外星人綁架案。

《X檔案》開拍一共6集嘅全新故事，已定美國時間本月24日首播，香港nowtv嘅FOX頻道（nowtvch518）都會同步播出，今、明兩日晚上9點有得睇，之後逢周二播出。

為宣傳《X檔案》，兩位主角近期都有頻頻現身，而「郭探員」姬莉安德遜日前受訪就講到演藝圈一向存在嘅重男輕女問題，佢自言90年代拍《X檔案》時，已比拍檔大衞杜楚尼嘅人工少一半，仲話今次再拍《X檔案》，劇組當初向佢開價都係比大衞少一半，令佢相當激氣。