岑麗香今日喺沙田為百貨公司開幕禮擔任嘉賓，同場仲有人氣卡通Hello Kitty同KUMAMON。罕有以性感透視連身裙現身嘅香香，面圓圓、上圍升CUP，雖然條裙有好多ruffles，但都遮唔住佢微隆嘅小腹，好有孕味喎。

大會仲送上印有香香同老公強強嘅合成BB相蛋糕畀佢，香香就狂話多謝大會嘅祝福。

香香接受訪問嗰陣，問到係咪可以恭喜佢？香香否認指：「條裙好多泡泡嘢啫，總之適當嘅時候會講，畀少少時間我，我哋努力中。」

大會送嗰個「合成BB」係囝囝，問到香香想生仔定女？佢話：「到時先算啦，都係祝福嚟嘅。呢刻係有啲壓力，最緊要調理好身體，有舒服嘅心態。o依家唔會話叫我『快啲』，直頭問幾時生，畀少少時間我消化吓，總之適當時候會講。」

佢話啱啱喺加拿大探完屋企人返黎、最近都成日飛，因為身邊好多朋友結婚。咁強強呢排會唔會特別緊張你？香香話：「我緊張佢多啲，我呢個時候係休息，學吓調理身體、煲吓湯、煮吓嘢食同埋做運動，佢就做嘢成日飛來飛去，不過有時我都可以搭單陪佢飛。」

至於聖誕，香香話可能會再返加拿大，今年有份提名影后嘅佢，連大台頒獎禮亦未必會出席：「嗰段時間係結婚周年，2年啦，佢（強強）準備左surprise畀我，佢叫我hold住個期畀佢。」

做完訪問，見香香着住3吋高踭鞋，記者提叫佢小心啲，唔好着高踭鞋啦，香香有少少尷尬咁話：「多謝。」唔知係咪真係好快有好消息宣佈呢？

另外，區永權今日就為大會擔任司儀，問到好友張栢芝被指剛剛生女？佢話唔知情：「我都係睇傳媒報道，都有少少驚訝，不過都未知真定假。」被追問有冇聯絡過栢芝、有冇見過盛傳係栢芝囡囡經手人嘅新加坡富商？區永權就話冇搵過對方亦冇見過。

精選娛聞，喺晒《娛果》
http://fb.com/appledailyent