雨僑﹑張建聲﹑田啟文及石詠莉，以評判身份，出席喺荔園舉行嘅《猛龍特囧》網絡男神選舉，十位候選男神，經過自我介紹﹑泳褲及答問環節後，最後由9號現年22歲﹑報稱模特兒嘅鄧嘉傑，膺「男神」稱譽，佢並獲得十萬元現金獎，以及《導火新聞線》電影合約。

而表演嘉賓為網絡紅人「劉馬車」，佢係羅力威diehardfans，佢受訪時表示嚟現場唱《雙子情歌》，又話自己好鍾意羅力威，問佢知唔知羅力威女友雨僑都喺度？劉馬車表示：「係呀，咁啱嘅？（代表羅力威唱畀雨僑聽？）係呀。（好冧雨僑？）係呀，我冧羅力威多啲，冧佢啲歌。」

劉馬車又讚兩人好襯，屬郎才女貌：「希望佢哋有情人終成眷屬，亦希望自己有機會同雨僑合作。」問到有冇見網絡男神？劉馬車表示：「都幾靚仔，雖然唔夠我靚仔。（吓﹗你覺得你靚仔啲？）唔同嘅，我才華型，陽光啲。」

而雨僑繼同娃娃舜合作，今晚就遇到另一個網絡紅人劉馬車，佢話知道劉馬車今晚嚟呢個活動，亦知佢唱《雙子情歌》：「我有search劉馬車，知佢係羅力威粉絲，亦知《雙子情歌》係佢飲歌，喺網上search《雙子情..》，會出現雙子情歌劉馬車。（唱得好聽？）咁我又未聽。（對方靚仔嘛？）認識佢時候都好小朋友，因為喺網上睇過佢片，羅力威成熟啲，好難比較。」羅力威唱過畀你聽？雨僑話：「佢冇正式唱畀我聽，睇佢音樂會有唱過囉。」

劉馬車祝福佢哋有情人終成眷屬？雨僑聞言尷尬：「未有咁快，近日喺網上睇劉馬車動向，知佢有做婚宴嘉賓。（將來叫佢做你嘉賓？）我結婚佢都大個，到時都唔同我哋玩。」

其間劉馬車同雨僑應記者要求合照，劉馬車又不斷狂sell自己，又同雨僑講：「我好鍾意你0架，希望你哋有情人終成眷屬。」之後又同雨僑力sell，叫佢向蕭生（蕭定一）美言幾句，雨僑就話蕭生唔喺香港；至比賽中段，劉馬車終於上台演出，佢唱歌同羅力威有九成似，唱完就表演佢最拿手嘢──就係拍片，劉馬車拎住手機自拍，又喺台上狂sell：「我好搏，有乜嘢可以搵我，我好開心今晚嚟到呢度，希望時間永遠停留喺度，我哋明年今日再見啦。」