是日港股唔再自由行，跟埋美股日股碌落去。恒指跌216點，落到16305，估計唔使低至萬六點先至止得咳，係時候趁低買C輪博反彈。
滙控C輪4497：銀行股唔得，滙控（005）收136.80元，跌1.60元。上禮拜，有好幾日都係喺136元打底，吼住回見136元，買C輪。
諗隻4497，下月尾夠鐘，輪價50仙，溢價1.5%，槓桿率27.4倍（有效16.8倍），引伸波幅19.4%。嫌隻輪壽命唔夠長，則揀12月初到期嘅9043，輪價71仙，溢價3.8%，槓桿率19.3倍（有效10.8倍），引伸波幅18.8%。

建行C輪4556：建行（939）跌7.5仙，收3.45元，趁低買C輪，對象係4556，10月初到期，輪價28仙，溢價3.2%，槓桿率12.3倍（有效8.7倍），引伸波幅26.1%。
建行有幾隻9月左右到期嘅C輪，溢價15%甚至20%，千祈咪搞。
電盈C輪4464：電盈（008）升0.10元，收5.10元。C輪4464也文也武，收24仙，升32%，有15球易手。
隻輪9月尾夠鐘，行使價5.50元，溢價12.6%，槓桿率21.3倍（有效8.1倍），引伸波幅43.4%。行使價5.50元，炒呢隻，好易jarless（即係冇渣咁解）。
章盛