歐陽震華今日在中環為健康飲品宣傳，與創辦人馮雯熙一起分享養生健康之道，二人多年前曾合作拍劇。健康飲品主要成份由野生刺梨果釀製，Bobby笑言：「好似我唔係親生，係野生返去無綫拍劇。」事實上Bobby近日參與兩集大台劇《愛·回家之開心速遞》演出，和群姐（許思敏）的恩緣笑料百出大受歡迎，不愧為福將。

Bobby早前被傳媒拍到他與太太到海味舖掃貨，被指瑤柱當零食，以及高檔海味頂級養命法，Bobby笑住口否認：「唔係，食嗰啲又點會養命， 我食舊瑤柱好似香口膠咁，細個嘅時候就真係瑤柱蝦米當零食，邊有咁多薯片，薯片係我十幾歲時先有，以前就真係豪華啦。」Bobby羨慕好友馮雯熙可轉營做生意，並自嘲：「我就轉唔到營，一係賣海味囉，我諗出咗娛樂新聞之後啲海味會加價。」

網民激讚Bobby在《愛·回家之開心速遞》中演出可媲美台慶劇，他說：「唔好咁講，永遠少食多滋味，多得群姐咁有心，我係冇演技，經常要忍笑，拍時候好多人都望住我哋笑，都唔知笑乜，多謝劇組咁有心寫咗呢條線畀我，若果現實講我同群姐就好夾硬，但寫我哋前幾世就好合理，最緊要冇猥瑣同刻意，聽講珍姐（高層曾勵珍）都好滿意。」至於會否添食，Bobby笑說：「睇經理人放唔放人啦，你知天氣熱，我忙唞暑，真係好驚中暑，拍嗰兩日都好辛苦，未適應節奏，又要黐頭套，拍通宵，若果公司有需要，觀眾又想睇我，唔排除，但暫時吊下癮先啦。」Bobby稍後會和萬綺雯合作警匪劇集，他說：「希望將群姐加入劇集中，會返去提議下，到時就群姐同萬二蚊爭我，但唔知劇組放唔放人。」

-----------------------------
7月4日起 《蘋果動新聞》只限升級壹會員閱覽
繼續撐蘋果！