當年今日
關於我們

大發不動產 韓劇|張娜拉鄭容和驅鬼賣凶宅 陰森搞笑追看度高—LY

蘋果日報 2021/06/12 01:26

果籽讀戲室LY大發不動產張娜拉鄭容和凶宅韓劇驅鬼神棍

香港人最鍾意磚頭,所謂唔買都睇下無蝕底。但遇到凶宅就無人問津,樓價仲要大跌添。如果香港都有一個好似洪智雅咁嘅地產經紀,香港業主一定愛死佢。講緊嘅係韓劇《大發不動產》(韓國KBS頻道,香港黃Viu有得睇)中,張娜拉飾演的地產公司社長洪智雅一角,她專做獨市地產生意——只做鬼屋買賣,不單止幫苦主嘅單位超渡亡魂,之後仲跟手搵埋買家用市價出售(記住,唔使因為係鬼屋而割價),呢啲獨家生意未必人人夠膽做,仲唔大發!故事題材恐怖惹笑雙料炮製,加上張娜拉鄭容和首度合作,都算係話題作。
empty
最強童顏韓星張娜拉今次一反過往戲路,飾演造型冷艷的驅魔師。(網上圖片)

張娜拉開新戲路有驚喜

張娜拉憑一張娃娃臉,成為最強童顏韓星,老實講張娜拉一向接開貼近其個人特色的劇本,例如《童顏美女》、《GoBack夫婦》(張娜拉係要演回自己學生時代嘅戲份),今次一反過往戲路飾演造型冷艷的驅魔師,仲要耍番兩招,已經擔心佢能否勝任,不禁覺得導演編劇起用佢,而張娜拉又肯接都算幾大膽,甚至膽博膽;唔信睇下啱啱播完嘅《西西弗斯的神話》中朴信惠嘅失敗打女角色負評如潮,就係一線女星引以為戒的例子。劇中動作場面多,幸好導演把張娜拉拍得身手不凡,加上有《德魯納酒店》特效班底助陣,驅鬼場面陰森效果佳,加上精心設計嘅黑衣造型,無玩時裝表演,唔使着住高踭鞋驅鬼,件事乾淨利落兼貼地好多,完全為張娜拉加分。
empty
張娜拉的捉鬼造型和裝備都脫離了過往同類劇種的模式,甚有睇頭。(網上圖片)

角色設定不是鬼魅浪漫

編劇應該偏心咗,洪智雅(張娜拉)的人物設定夠看頭,捉鬼造型和裝備都脫離了過往同類劇種的模式,鋪陳出洪智雅式的格局:打火機、香爐、符、鹽陣就不用提了,那支結界槍和會消失的超渡髮簪確實令人留下印象,配合特效讓劇情更添神奇。只要亡魂甫現身,洪智雅就從口出噴出寒氣(像是戲肉出現的提場);同時她的體溫會下降,這設定都成為日後跟男主角互動的浪漫兼搞笑點之一。
empty
鄭容和身體狀態keep得好fit,但卻少了入伍前的秀氣,反添幾分佬味。(網上圖片)
女主角咁強勢,男主角又點?對住驅魔實力強勁嘅女主角,偏偏男主角鄭容和飾演的吳仁範就係捉鬼神棍,靠呃神騙鬼搵飯食。而事實上自己係有通靈天賦而不自知,遇上張娜拉才發現自己係「靈媒」打開人生的潘朵拉盒子。本來吳仁範嘅角色設定係富邏輯推理和觀察力的能力者,但睇咗咁多集都覺得佢係讀書唔成變了身光頸靚的光棍,總之角色英氣欠奉,粉絲該會有點失望了。鄭容和退伍首作表現不過不失,身體狀態keep得好fit,但卻少了入伍前的秀氣,反添幾分佬味,遇上童顏張娜拉,本來是年下配搭,一下子感覺就沒有了,相信劇組都放棄了宣傳這點!劇情發展下來還未看到兩人的化學作用,CP感略嫌不足,且看劇集的後半部能否為他們鋪排更好的感情戲。
點解講咁多人設嘅嘢?因為套劇係好睇,但如果唔知道前設,好易會一頭問號,或只係覺得點解一開劇捉鬼場戲特效咁好,但劇情好似有啲造作又兒戲咁,又無解釋點解女主角要吐煙(當時以為又係特異功能),捉鬼真係齋捉又無故事跟尾,唔好問前因後果。睇落去,哦,原來呢集用來展示工作概覽。
empty
要解開洪智雅(張娜拉)媽媽洪美珍死亡之謎,是極具追看性的一部份。(網上圖片)

洪美珍之死一路帶戲

此劇一集比一集好看,內容有剝洋蔥的層次感,追看度十足。要解開洪美珍(洪智雅媽媽)死亡之謎亦是極具追看性的一部份,為甚麼洪美珍的鬼魂不能離開?究竟洪美珍驅魔失敗而成為了加害者還是被害者?究竟是洪智雅的記憶錯誤還是鬼上身的吳仁範記憶有偏差?朱室長為甚麼偷走了《1979年驅魔記錄》?想掩蓋甚麼?
洪智雅因為要為找最強靈媒幫媽媽洪美珍超渡,吳仁範為了查出叔叔死亡原因而接近洪智雅,當兩人決定合作,劇情開始加插捉鬼的個案故事,人情味的元素逐漸增多,真係越睇越好睇。每當解決一個捉鬼個案,就會出現多一點洪美珍死亡的線索,特別是去到第15集,當洪智雅的記憶出現了沒有五官的吳仁範時,便出現了「雞蛋鬼」的線索,甚麼是「雞蛋鬼」呢?不單止主角去要去追查,連觀眾都吸引到投入劇情一同去追。
empty
《大發不動產》營造的驚慄鏡頭效果有一手。(網上圖片)
解決個案後的另一個看點就是兩人身體或性情都會產生變化,特別是捉鬼後遺症,算是給鄭容和演技露兩手的機會,少有驚喜。這條橋把驚慄劇情搞笑化,效果不錯,為免劇透,這部份就留待讀者自己去發現。結局剛剛播出,收視口碑不俗,不知推理迷有否猜中劇情。順帶一提,此劇營造突發驚慄鏡頭效果真的有一手,追劇時不妨自我營做暗黑氛圍,應該會睇到更加緊張,適時仲會嚇親你。
撰文:LY
-----------------------------
蘋果App大升級 更簡潔更就手!了解更多立即下載體驗