澳洲專家利弗（JohnLever）來港捉鱷魚，雖然徒勞無功，但賺晒曝光，上埋BBC、CNN及《亞洲華爾街日報》頭版，起碼威番一陣。捉鱷魚這回事，須保持耐性、冷靜，急唔嚟。世界上鱷魚出沒嘅地方，肯定冇一處有元朗山貝河咁鄰近民區，燈光火着，人聲鼎沸嘅，鱷魚獵人亦唔會俾幾百架相機監視住，利弗捉唔到條小鱷，何忍深責。最好笑嘅，利弗初嚟到敝境之時，勞工處話佢要攞工作證。過往幾日，利弗係唔係以遊客身份，到山貝河釣魚呢？

移民局做事亦似勞工處咁官僚，評馬W最近請工人，介紹所推介一位來港不久就斷約嘅尼泊爾女傭，評馬W見過，認為啱用，於是入紙移民局申請，手續需時一個月，但係斷約嘅外傭只准留港十四日，評馬W問僱傭公司：「點搞呀，我冇理由先送佢返去尼泊爾，再等佢坐飛機返嚟嘅噃？」僱傭公司話：「你定啲嚟，我哋送尼傭入內地暫住十幾日，等搞掂手續後再叫佢出番嚟。」咦，僱傭公司真醒，去內地設立「雙魚河放草場」，好似隻馬跑到攰咗，就送去雙魚河一頭半個月，休養夠嘞，先至攞番出嚟沙田。評馬W大讚好計之餘，不禁又擔心，尼傭去到內地小住，會唔會染上陋習或出現健康問題呀？多一個變數噃？左丁山聞言為之失笑，問評馬W：「可唔可以先叫隻馬（尼傭）隔離檢疫一星期，證明冇事先去叫佢出嚟？」評馬W當然知道冇乜可能，但亦無可奈何，人哋做生意咁醒目，都係為咗賺錢啫，自己冒吓風險啦。