【無懼死亡】陳積榮被嘲拍「屎尿屁」口水戲 盼抗癌後拍一部屬於自己電影
蘋果日報 2020/09/07 14:12
陳積榮肺癌藝員訓練班
面對死亡，有誰不感恐懼？陳積榮（Jeff）在今年7月證實患上第四期肺癌，醫生告之最壞情況只剩半年壽命，仿似死亡筆記般，生命有時限。
不煙不酒，有沒有埋怨個天？陳積榮說：「嗯，冇怪個天，我反而調轉，呢段時間好感恩，好感激好多朋友，一啲就算唔識嘅人都會幫我。」性格樂天的Jeff，選擇用積極的態度面對惡運，依足醫生吩咐，每日出外曬太陽，做簡單運動，保持正向思想，他相信會有奇蹟：「我有睇第二個醫生，話醫到機會高嘅，但當然要自己努力，呢段時間心境、壓力、身體，點樣調節去打贏呢場仗，有奇蹟㗎！醫生都有同我講，有完全健康嘅例子，所以我都唔會放棄。」
不放棄的，還有他一直追尋的演藝夢。Jeff在大學時期修讀建築及工程系，一畢業便投考無綫藝訓班，入行後一直做行行企企的角色，可能今日是速遞員，有兩句對白，廿集之後，是地盤工人又有半句對白，過多幾日可能做「唔覺眼」死屍，同一部處境劇可以出場無限次：「呢個係TVB特色嚟，你話好好人工就唔係，可以（應付）基本開支，我有時覺得唔喺錢嘅角度，喺TVB係學到嘢。」為何決定離開TVB？他解釋：「其實合約3年之後，係自己選擇離開，公司都有叫我留低，當時後生，確實覺得機會唔係太多。出咗嚟之後，發現呢個世界好大，好多人都好勁，有更加多嘢要學，要增值自己，先可以喺呢一行生存。」
離開TVB，輾轉到過HKTV拍劇，可惜未獲發免費牌，令好多人失業，Jeff亦試過兩年沒有收入：「我咁耐都冇去離開呢一行，自己覺得冇理由，一定要捱到，就係因為鍾意。」
機緣之下，Jeff去了大陸拍網絡電影，並開始他的創作之路，自資拍三部近乎「零成本」電影，包括《戀愛36D》、《最囧麻花》和《荒島屍變》：「一開始梗係冇budget，柴娃娃拉啲朋友，同藝訓班同學仔，拍咗幾部電影。曾經收過朋友一個message，佢鬧我，話『你拍咩垃圾出嚟，你咁嘅垃圾，都當自己電影呀，大導演呀？』我都有同鬧我嘅人講，我都知口水戲、屎尿屁，玩啲無聊嘢，其實我真係知㗎，所以我更加想拍一部好嘅電影，要拍正正經經有製作嘅電影，唔好話代表香港人啦，最少要代表我作為演員嘅心聲，我想呈現嘅嘢。」
Jeff由去年初開始籌備一部關於訓練班的電影，問到讀訓練班是否捱得好辛苦？他說：「訓練班一定辛苦，我相信每個經歷過訓練班嘅演員，都一定明白嗰種辛苦。」原本已找到投資者籌措部份資金，但疫情令工作停頓，如今Jeff還要全心全意治病，無奈要將夢想暫時放下。
Jeff透露現在已開始做電療：「辛苦㗎，尤其電療呢個禮拜，我都瘦咗8磅10磅，頭兩日以為冇事，後面嗰幾日唔舒服開始嚟。我唔知係咩，囉囉攣、迷迷地、唔舒服要瞓喺度，會唔會嘔？5日嘔咗3日。」不過好彩，香港地仍然有好多有心人，他拍片講述患癌後，好多人都在金錢上、物質上主動支持他：「最深刻一次，有個我唔識嘅人，問『你住邊度？』。於是我約咗屋企附近一個地方，都去到我屋企門口㗎啦，佢專登嚟同我傾偈，同我講咗好多嘢，因為原來佢有同樣經歷，佢送咗張支票畀我，我覺得都唔係最大件事，突然喺架車拎咗盒花膠畀我，我反而覺得，真係好多有心人。」說時忍不住眼泛淚光。
採訪：嵐山
攝影：陳慧安
攝錄：廖達燊
陳積榮已開始接受電療，但思想正面，每日都有做簡單運動。
Jeff雖然是修讀建築及工程系，但一直對演藝圈好感興趣。
醫生告之最壞情況只剩半年壽命，但Jeff仍堅信有得醫，命運可以逆轉。(影片截圖)
一年前已開始籌備一部關於訓練班題材的電影，希望可以籌集資金，認真製作。(受訪者提供)
Jeff與孫慧雪、謝珊珊、鄧永健等一班訓練班同學第一次拍攝電影《戀上36D》，還邀請到譚玉瑛友情客串。(受訪者提供)
Jeff對演藝圈好感興趣，大學讀建築及工程系，一畢業便投考無綫藝員訓練班。(受訪者提供)
Jeff曾遭友人負評，拍「屎尿屁」口水戲。
Jeff不幸患上肺癌，但女友仍不離不棄照顧。
-----------------------------
《蘋果》英文版免費試睇：了解更多
-----------------------------
《本土情味》結集《飲食男女》雜誌經典欄目「老字號」文章，記錄香港40家飲食老店的動人故事，見證香港飲食史的甜酸苦辣。即日起，於各大便利店及書報攤有售，並於 《蘋果日報》你的優惠 網上獨家發售！