鄭丹瑞（旦哥）、周秀娜同「巨胸翠如」鄧月平前晚到中環HMV宣傳電影《小男人週記3之吾家有喜》，最近密集式做宣傳同訪問搞到失聲嘅旦哥，𠵱家講嘢都喉沙沙，佢話：「上個禮拜做咗十幾個訪問，醫生叫我封嘴一星期，唔好講咁多嘢，否則就會好似𠵱家咁。」問佢太太見到係咪好心痛？旦哥即笑住話：「有，但佢同屋企人去咗韓國玩。」

「你我都有料」

呢套戲集合咗新舊咪神周秀娜同鄧月平，又話喺配合主題愛舊迎新，咁娜姐點睇呢？佢話：「戀愛方面我送舊好耐， 早排去挪威睇北極光，個個都關心我有冇艷遇，我都諗住會有嘅，食吓外國菜，倒數嗰晚有個講普通話嘅男仔主動話想認識我，佢仲好尷尷尬尬咁望住我好耐，但我就俾朋友拉走咗，最終都係冇下文。」咁人在他鄉，老外會唔會有機會呢？娜姐即刻話：「我鍾意食唐餐。」
新一代咪神鄧月平話好期待戲中同娜姐去揀bra嗰場戲，佢有幸𥄫到娜姐美好身段，即刻忍唔住嘩一聲嗌咗出來：「我覺得娜姐好正，真係好羨慕。」娜姐就話鄧月萍：「你都係有料之人，有乜嘢好羨慕呢！」
撰文：馮仁昭