韓國型男玄彬夥拍女星朴信惠出演嘅tvN新劇《阿爾罕布拉宮的回憶》噚晚播出第10集，由於劇情越來越緊湊，所以收視就升至9.207%，創開播以來新高。

噚晚一集講到玄彬同秘書喺西班牙玩「AR擴增實境」遊戲，點知遊戲中嘅一班神秘人突然出現，並追殺二人，最終秘書陣亡，但疑似佢喺現實生活中都死亡。玄彬要喺指定時間內完成任務，仲要去到阿爾罕布拉宮救「master」，玄彬去到宮中地窖，即被大群喪屍攻擊。

當玄彬快要陣亡之際，此時秘書卻突然以同盟身份再次現身，並協助玄彬殺敵人，不過秘書此時已成為遊戲人物，亦代表佢喺現實中已死亡，同時朴信惠亦接到西班牙警方嘅電話，通知佢秘書已死。而玄彬繼續獨自對抗敵人，但當佢正想放棄時，一道光芒突然出現，似乎生命危在旦夕嘅玄彬將會有轉機。

至於失蹤多時嘅燦烈依然下落成謎，雖然前晚播完第9集後播出第10集預告時，大家以為燦烈會回歸，但原來該場面只係朴信惠發夢嘅情節。

而噚日第10集結尾就播出下一集預告，當中可見玄彬問朴信惠：「我哋係甚麼關係，難度我哋係戀人關係？」朴信惠就叫玄彬當佢係戀人，之後見玄彬係雨中淋雨，拎住雨傘嘅朴信惠就急步行到玄彬前，玄彬疑似想咀朴信惠，唔通下集會有二人嘅咀戲？

精選韓流，喺晒《娛果》
http://fb.com/appledailyent