【本報訊】郭炳江是虔誠教徒，有懲教署中人透露，郭炳江約於10年前隨教會，以義工身份到石壁監獄探望在囚人士，指郭雖為地產富豪，探監時毫無架子，彬彬有禮，「證明佢係好人」，指知悉其被判入獄，轉換角色進入監獄，感到愕然。
「睇佢刑期，多數去石壁，不過佢都應該唔陌生。」該人士稱郭炳江2003至04年間，經常隨教會到石壁監獄向教友犯人作見證、傳福音。他憶述當時郭並無保鑣隨行，非常低調，和囚友「講吓信主、傾吓偈，鼓勵佢哋重新做人，毫無架子坐埋一齊傾，中間玻璃都冇隔一塊」，更說部份釋囚遇到難題，郭炳江都願伸出援手。

「冇擺富豪款」

他又憶述，當時石壁監獄內有郭的舊相識，也是教友。建築公司威樂控股前主席鄧耀康、其胞弟鄧耀銓2002年因串謀詐騙股東盜取股份、非法處理收益，及偽造、使用虛假文書等，各被重判入獄10年，「當時佢哋見面都會傾偈」。
該人士又說：「郭炳江係新鴻基大老闆，咁有錢又咁忙，得閒都陪吓屋企人啦，點估到佢會去監房？但佢都肯去，證明係好人，係發自內心。佢又冇擺富豪款，好平民化，仲好有禮貌，唔該前唔該後」。
對於獄中生活，該人士指石壁監獄大多囚禁香港本地犯罪人士，「少啲道友，品流冇咁複雜，好少打交，怕加監嘛！個個都想快啲出返去」。
他認為對郭炳江這獄中新丁而言，石壁是不錯環境，又指獄中是否需要工作，要由醫生判斷在囚人士身體狀況而定，如郭身體狀況欠佳，相信毋須體力勞動。
■記者馬志剛