花旗股市一跌就係280點，第二日嘅亞洲市幾乎肯定裂口低開，呢樣就係俊樺呢排成日講嘅風險，花旗股市上去嘅情況都一樣，呢種波動市好難玩，好彩嘅贏幾粒糖，唔好彩嘅就輸間廠，大裂口高開同低開都好大殺傷力，唔係話避就避到。
花旗股市喺港股期指結算前搞啲咁嘅嘢，擺明同班好友過唔去，港股昨日跌咗成700點先企得定，都算班好友夠勁，掃番高幾百點，收市嘅跌幅只係300零點，如果昨晚花旗拗腰炒上，今日班好友又會發威。
睇咗聯儲局嗰份會議紀錄，大家都唔應該對花旗嘅經濟前景有太大期望，仲有數據話信用卡嘅壞賬大幅攀升，除咗影響銀行嘅盈利之外，亦反映未來花旗消費市道，花旗靠內部消費支持經濟，國民又鍾意先使未來錢，呢鋪點搞？

工行C輪9600：工行（1398）昨日報收4.86元，試吓條50日線後迅速反彈高收，個市穩番啲會再試5.1元，破咗位起碼睇5.6元，可以買啲C輪9600，昨收44仙，槓桿11倍（有效6.2倍），對冲值0.56，正股升上5.6元，9600應該喺94仙樓上，正股見5.1元隻輪都有3成幾升幅，正股跌穿4.65元止蝕。